Haur eta gazte literaturako gure gomendioak

1936. urtea, zirko bat herrira iritsi berri. Elefante bat dakarte eta etxeko ikuiluan egin diozu lekua. Hurrengo goizean, haien arrastorik ez. Gerra hasi da, eta frankistek desagertarazi egin dituzte askatasunaren sinbolo diren pertsonaia guztiak. Malen Amenabarrek txapela kentzeko moduko espresioz ornitu du protagonista gaztearen aurpegia eta denboraren joanak memorian duen ezabatzeko joera metafora txundigarriekin orditu du.

Zapo bat da album honen zentroa eta haren jira-biran xomorro jostariak dabiltza. Protagonista tripazorroak aisa egingo ditu intsektuekikoak, harik eta bere mingainaren neurriko aurkaria azalduko zaion arte. Haurrek berehala bereganatuko dute Goliat menderatzearen plazera eta errepikapena eta erritmoa oso da egokia ilustratzaile ez ezik idazle lanetan ere bikain moldatzen den Maite Mutuberriaren lan honetan.

Har al daiteke preso antzezlan bat liburu batean? Tximeletak ehizatzeko sarea erabiltzen den bezain delikatuki astinduta akaso… June San Sebastianek maisuki islatu du marrazkitan gerraren krudeltasuna, kolore paletaren gustu eskisitoz. Leire Bilbaoren testuak fintasunez kontatzen du gerra: «Kolororeak hautsi egin dira». QRen bidez artefaktu honetan erantsita daude ikuskizun honen koreografia batzuk ere.

Lur gainean bizitzeko alaitasuna hitz xumeen bidez inbokatu nahi duten pertsonentzako liburua da Antton Irustarena. Bere sorkuntzako nahiz besteren ahotik entzundako pasarteak bildu ditu irakaspenez betetako 46 alegiatan. Ekialdeko ipuinen kutsua dute ipuin hiperlaburrek: gure baitan den zoriona bilatzeko gonbidapenak, inbidia, dolua bezalako sentimenduak kudeatzeko gomendioak eta askatasunari gorazarre egiteko ereserkiak sortu ditu.

• Temas
• Euskal Literatura
• Euskera