Bernardo Atxagaren 'Behi euskaldun baten memoriak', Erresuma Batuko 20 liburu salduenen artean

Bernardo Atxagaren 'Behi euskaldun baten memoriak' lana Erresuma Batuko aurtengo 20 liburu salduenen artean dago. Dedalus argitaletxeak itzuli du ingelarara 'Memoirs of a Basque Cow' obra, Margaret Jull Costa itzultzailearekin elkarlanean. Ingelesez gain, lan hau beste hamalau hizkuntzetara itzuli da, hala nola, gaztelaniara, frantsesera, arabierara edota ukrainierara.

The Guardian egunkariak argitaratu berri du britainiarrek gogoko dituztenen 20en zerrenda, Erresuma Batuko liburu-saltzaile independenteen iritzia aintzat hartuta, alegia. Liburu hori Norwicheko Henry Laytek aipatu du,The Book Hive liburu-dendaren arduraduna denak. Liburu-dendako jabe bakoitzak hiru liburu hautatzen ditu, eta, Laytek aukeratu behar zituen hiruen artean jarri du 'Behi euskaldun baten memoriak'.

1991. urtean plazaratu zuen Bernardo Atxagak obra. Bertan Balantzategi baserrian jaiotako Mo izeneko behiaren nondik-norakoak ematen dira aditzera, animalia honen hausnarketetatik abiatuta. Istorioa Espainiako Gerra Zibilaren ondorengo urteetan jazotzen da.

Jose Irazu Garmendia 'Bernardo Atxaga' ezizenarekin ezaguna dena, euskal idazle entzutetsu eta munduan barrena ezagunenetakoa dugu. Bereziki, 1988. urtean plazaratutako 'Obabakoak' ipuin-bildumak egin zuen ospetsu nazioarte mailan. Bere literatur ibilbide oparoan hainbat genero landu ditu: eleberria, ipuina, saiakera olerkigintza, antzerkia eta gidoigintza, besteak beste. 2007. urtean Euskararen Akademia Ofizialak euskaltzain izendatu zuen.

• Temas
• Bernardo Atxaga
• euskera
• Euskal Literatura