Zinebi Networking foro profesionalerako deialdia zabalik

Zinebi Bilboko Dokumentalen eta Film Laburren Nazioarteko Jaialdiak 'Zinebi Networking: Dokumentalen sorgunea', zinema dokumentalaren Bilboko VI. Foro Profesionalerako deialdia zabaldu du, zinema dokumentalaren esparruan ikus-entzunezko ekoizpena bultzatzeko helburuarekin. Aurten, Zinebiren 65. edizioaren esparruan egingo da, azaroaren 14tik 17ra artean.

Ekimenaren antolatzaileek nabarmendu dutenez, foroak eskualdeko ikus-entzunezko sarea indartzen laguntzeko proiektuak bilatzen ditu, izan ere, dinamizaziorako eragile izan nahi du, sektoreko eragileek zinemagintzaren eta ikus-entzunezkoen industriako tokiko zein nazioarteko erakundeekin duten harremanari dagokionez.

Interesdunek jakin behar dute parte hartu nahi duten film luze dokumentalen proiektuak aurkezteko epea irailaren 15era arte egongo dela zabalik, eta izen-emateak hemen egin behar direla. Aurkeztutako proiektuei dagokienez, oso aurreratuta edo ekoizpen fasean egon beharko dira, eta profesionalek eta, Zinebiren zuzendaritzarekin batera, adituek osatutako hautaketa batzorde batek aukeratuko ditu parte hartuko dutenak. Proiektu bakoitzaren ideia, proposamen estetikoa, bideragarritasuna eta produkzio aukerak hartuko ditu aintzat.

Hautatutako proiektuek tutoretza pertsonalizatuen saio batean parte hartuko dute, jendaurrean aurkeztu aurretik. Horretarako, aurkezpena pitching saio batean egingo dute, nazioarteko epaimahaia osatuko duten profesionalen aurrean, eta, ondoren, aholkularitza bilera pertsonalak egingo dira ekoizpen etxeen eta parte hartzaileen artean.

Jakinarazi dutenez, beste behin ere, Foroak bi sari emango ditu dirutan, bakoitza 10.000 eurokoa, eta biak azaroaren 17an banatuko dira, Arriaga Antzokian egingo den Jaialdiaren itxiera ekitaldian. Zinebi Networking: Dokumentalen sorguneak Euskal Autonomia Erkidegoko proiektu onenari ematen dion saria 10.000 eurokoa da eta EITBren babesa du. Bestalde, Euskal Autonomia Erkidegotik kanpo ekoitzitako proiektu onenak 10.000 euroko saria jasoko du.

• Temas
• Euskera
• Zinema