Gorbatarik gabeko lehendakaria

Ezin da jardun politikoan gorbataren erabileraz hitz egin duela gutxi, 2011n hain zuzen, gertatu zen pasadizo bat gogoratu gabe. Kongresuko orduko presidenteak, Jose Bono sozialistak, errieta egin zion Miguel Sebastian Industria ministroari, PSOEkoa bera ere, osoko bilkura batean gorbata ez eramateagatik. Are gehiago, eskerrak eman zizkien gainerako diputatuei «diziplina» betetzeagatik. Sebastian ez zen kikildu eta Estatuko hirugarren agintariaren aurrean bere erabakia defendatu zuen, uda betean energia aurrezteko keinu gisa.

Hamahiru urte igaro dira gertakari hartatik, eta denbora horretan gorbatak desagertzen joan dira jarduera politikoan. Eta ez energia aurrezteagatik, Sebastian ministroak azaldu zuen bezala, gure agintariek informaltasunerako bide progresiboa hartu dutelako baizik. Denboraren joana, alderdi berrien agerpena, politika kalera hurbiltzeko saiakerak... Horiek dira, besteak beste, egungo politikan gorbata ezinbesteko elementua zergatik ez den azaltzen duten arrazoietako batzuk.

Euskadin aldaketa hori are nabarmenagoa egin da Imanol Pradalesekin. Hauteskunde-kanpainan hartu zuen erabakia, gorbata eramatea saihestu baitzuen. Ekainean Ajuria Enea Jauregira iritsi zenetik, apustu hori berretsi du, eta jantzi hori ekitaldi instituzional garrantzitsuetarako gordetzen du. Ohikoa da bera ere gorbatarik gabe ikustea Eusko Legebiltzarrean. Han ez da gauza arraroa, legebiltzarkide gehienek jantzi hori alde batera uztea erabaki baitute.

Argi dago hori guztia ez dela kasualitatearen ondorio, erabaki baten ondorioa baizik. Pradalesek aro berri baterako hurbiltasun eta modernitate irudia eman nahi du. Aldi berean, aldaketa nabarmena irudikatzen du Iñigo Urkullurekiko, berak gutxitan kentzen baitzuen gorbata, udan izan ezik. Hori bai, trajeak edozein lehendakariren bereizgarri izaten jarraitzen du, kargu horrek, gaur egun behintzat, gizon izatea eskatzen duela ematen baitu. Agian etorkizunean lehendakari emakume bat izango dugu. Eta agian berak gorbata berreskuratuko du...

• Temas
• Euskera
• Politika
• Politikafetxo bat?