Urratsak eginez

Bilboko Udalak berdintasunaren aldeko neurri gehiago gehitu dizkie lehenagotik indarrean jarritakoei. Izan ere, genero-klausulak gehituko ditu baldintza-agirietan eta diru-laguntzak jasotzeko aukerak ukatuko dizkie ekitatearekin bat egiten ez duten elkarteei. Honakook eta antzeko beste zenbait datorren astean onartzekoa den gizon eta emakumeen arteko berdintasunaren aldeko ordenantzan daude jasota.

Helburua udalarekin lotutako edozein jardunetan diskriminazio mota oro baztertzea da. Baina gehiago ere badago: funtzionarioen amatasun eta aitatasun baimenak parekatzera joko da eta, barne promozioei begira, langile horiek berdintasunean duten ezagutza aintzat hartu. Modu horretan, arlo honetan puntakoenak diren udalen artekoa izango da Bilbokoa, esanetik izanera igarota. Eta hori da Martxoaren 8ari eman beharreko segida, egunerokoan eragitea, berdintasunaren aldeko eragile eraginkor gisa ekitea. Erakundeek eurek barrura zein kanpora begira oraindik dituzten gabeziak estaltzea eta Emakumearen Eguneko aldarriak zeharkako egitea, arlo jakin baten ardura soil izan beharrean. Gehiegitan mugatu direlako, halako batzuetan ezartzea nahikoa bailitzan.

Bilbo goi-mailako hiria da, kulturarekin lotutakoetan, azpiegituretan, ongizatean, baliabide publikoen kudeaketan. Eta baita eraldatze prozesu sakon bezain eredugarria izan duelako ere. Kanpoan zein inguruan aitortu diote adore berezia erakutsi duela erronkarik handienei aurre egiteko, hondoa jotzear zegoela bere burua berrasmatzeko, berregiteko. Guzti hori borobiltzeko, baina, aitzindari behar du gizarte aurreratu bati dagozkionetan. Eta horietan oinarrizkoenetakoa da gizon eta emakumeen arteko berdintasuna. Ez delako noizean behin modu handiosoan aldarrikatzekoa, norbere ezaugarri egitekoa baizik.