Hamahiru urteko gatazka Sirian

Siriako ume gehienek ez dute inoiz bake garairik bizi izan. Gatazka da ezagutu duten errealitate bakarra. Izan ere, gerrak iraun dituen 13 urte hauetan haur eta nerabeek jasan dituzten ondorio fisiko eta psikologikoak ikaragarriak izan dira; besteak beste, indarkeria- eta desplazamendu-ziklo errepikatuek, krisi ekonomikoak, muturreko gabeziek, gaixotasun-agerraldiek eta iazko lurrikara bortitzek ondorio larriak utzi dituzte haurren belaunaldi oso batean.

Siriak ez ditu normalean nazioarteko titularrak hartzen baina azken sei hilabeteetan bizitzen ari den indarkeriaren gorakada lau urtean herrialdeak bizi izan duen okerrena izan da. Bestalde, 13 milioi siriar baino gehiago (gatazkaren aurreko biztanleriaren erdia, gutxi gorabehera) Sirian edo Siriatik kanpo desplazatuta daude eta ezin dira etxera itzuli. 13 urteko gatazkak milaka haurren etorkizuna eta bizitzak suntsitu ditu.

Horrek eragin zuzena dauka haurrengan. Bost urtetik beherako 650.000 haur baino gehiagok desnutrizio kronikoa dute, 2019an baino 150.000 gehiago. Desnutrizio kronikoak eta hazkundearen atzerapenak kalte itzulezinak eragiten ditu haurren garapen fisikoan eta kognitiboan, eta eragina du haien ikasteko gaitasunean, produktibitatean eta helduaroko euren bizimoduan.

Horrez gain, Siria iparraldeko familiei egindako inkesta baten arabera, nesken % 34k eta mutikoen % 31k asaldura edo larritasun handia dute eta laguntza psikosoziala behar dute. Bestalde, eskola-adinean dauden 5,5 milioi haurren ia erdiak – 5 eta 17 urte bitarteko 2,4 milioi haur inguru – eskolatu gabe daude.

Ezin dugu ahaztu, gainera, iazko otsailean gertatutako lurrikara hilgarriek herrialdeko iparraldeko eremu zabaletan eragin handia izan zutela. Gatazkak ahuldutako azpiegiturak oso kaltetuta zeuden eta lurrikaren ondoren, kalteak izugarriak izan ziren. Familia askok beren diru-sarrera nagusia galdu zuten heriotzaren edo lesioen ondorioz egoera ekonomikoa jada negargarria zen garai batean, eta horrek areagotu egin zuen oinarrizko beharrak asetzeko gai ez ziren milioika pertsonen zaurgarritasuna.

Gaur egun, Siriako herritarren bi herenek baino gehiagok laguntza humanitarioa behar dute, eta momentu honetan, finantzaketa humanitarioa minimo historikoetara jaitsi da, bai Siriaren barruan, bai inguruko herrialdeetan desplazatuta dauden siriarrentzat. Finantzaketa-premia handienak ura, saneamendua, higienea, osasuna eta hezkuntza dira; eta haurren babesak ere lehentasun handia izaten jarraitzen du.

Izan ere, Siriako gerran, munduan gertatzen ari diren beste gatazka guztietan bezala, haurrak dira beti galtzaile.

• Temas
• UNICEF
• Euskera
• Mundua