Unibertsitatez kanpoko ikasketetarako laguntzen zenbatekoa % 23 igo zen aurreko ikasturtean

Administrazio publikoak 63,7 milioi euro bideratu zituen 2021-2022ko ikasturtean EAEn unibertsitatez kanpoko ikasketen beka eta laguntzetara, aurreko ikasturtean baino 12 milioi gehiago. Horrek %23ko igoera suposatzen du, Eustaten datuen arabera.

Orotara, 115.441 ikaslek jaso zituzten beka eta laguntza horiek. Hala ere, bideratutako zenbatekoaren banaketak eta beken onuradun izan ziren ikasleen kopuruak ez zuten aldaketa nabarmenik izan aurreko ikasturtearekin alderatuta.

Beraz, dirua kopuruaren hazkundeagatik bekadun bakoitzak laguntza handiagoa jaso zuen. Oro har, kopurua 552 euro izan zen ikasle bakoitzeko, mailaren arabera aldeak izan ziren arren. DBHko ikasleek batez bestez kopururik txikiena jaso zuten, 290 euro, eta erdi mailako Lanbide Heziketako bekadunek berriz 1.000 euro baino gehiago.

Bestalde, 2021-2022ko ikasturtean 407.941 pertsona matrikulatu ziren EAEn unibertsitatez besteko irakaskuntza arautuetan, aurreko ikasturtean baino %1 gutxiago, eta Haur eta Lehen Hezkuntzako mailek 2.200 ikasle baino gehiago galdu zituzten.

Haur Hezkuntzaren kasuan, 2012-2013 ikasturtetik pasa den ikasturtera, 20.000 matrikula baino gehiago galdu dira. Aldiz, Lanbide Heziketako erdi-mailako eta goi-mailako ikasleen artean hazkundea dago. Sei urtean 40.000 ikaslek baino gehiagok eman zuten izena ikastetxeetan.

Bestalde, Hizkuntza Eskola Ofizialetako matrikula kopuruaren beherakadak Araubide Bereziko Irakaskuntzen joera negatibo globala markatu zuen. Hala ere, Arte Plastikoen eta Diseinuaren eta Kirolaren irakaskuntzetan ikasle kopurua %10 baino gehiago handitu zen aurreko ikasturtearekin alderatuz.

2021-2022ko ikasturtean erdi eta goi mailako Lanbide Heziketako ikasketetan matrikulatuta zeuden ikasleen heren bat baino ez zen emakumea izan. Hala ere, genero arrakala are handiagoa izan zen STEM lanbideekin lotutako lanbide familien prestakuntza zikloetan.

Lanbide Heziketako matrikula kopuruaren erdia baino gehiago ikasketa mota horietan egin zen, eta emakumeen presentzia %11 baino pixka bat handiagoa izan zen.

• Temas
• Eusko Jaurlaritza
• Euskera