UEMAk eta udalek uda honetan ere euskara sustatu nahi dute zerbitzuen sektorean

Udalerri Euskaldunen Mankomunitateak eta bertako kide diren dozenaka udalek 'Bertatik Bertara' kanpaina eramango dute aurrera uda honetan ere, bisitarien eta haiekin harremana duten langileen artean euskara sustatzeko. Hainbat garapen agentziak ere bat egingo dute kanpainarekin, aurreko urteetan bezala. Ekimena joan den ostiralean hasi zen eta irailaren erdialdera arte luzatuko da.

Mankomunitateko iturriek jakinarazi dutenez, laugarren urtez jarraian egingo den kanpainan, UEMAk eta udalek baliabide ezberdinak eskainiko dituzte sektoreko enpresa, langile eta bezeroen artean. 'Bertatik Bertara' kanpainarekin, tokiko produktuen, paisaiaren eta gainerako eskaintza zabalaren artean, UEMAk nabarmendu nahi du euskara dela udalerri euskaldunen nortasuna hobekien islatzen duena, ekimenean parte hartuko duten udal eta garapen agentziekin batera.

Horretarako, hainbat baliabide prestatu dituzte bisitarientzat, zerbitzuen sektoreko arduradunentzat eta langileentzat, guztiak joan den asteko ostiraletik eskuragarri. Guztira, 300.000 banner, mahai gaineko eta hiztegi banatuko dira agenteetzat eta zerbitzuen sektoreko langileentzat informazioa emateko, eta taberna eta jatetxeetan erabiltzeko. Era berean, bertsio digital bat egin da, bisitariek hiztegi horiek mugikorrean erabil ditzaten.

Gainera, aurten lehen aldiz, UEMAk diptikoak ere prestatu ditu euskaraz, ingelesez, katalanez, gaztelaniaz, frantsesez eta galizieraz, turismo-bulegoetan, ostatuetan, landetxeetan eta antzekoetan zabaltzeko.

Bertako hizkuntza ere «kalitatea eta hurbiltasuna erakusteko ezinbesteko osagaia» dela gogoratu nahi die kanpainak zerbitzuen sektoreko arduradunei, dio kanpainaren koordinatzailea den UEMAko Goizane Aranak. «Askotan bertako hizkuntza alde batera uzten dugu, bisitariei gaztelaniatik hitz eginez. Ez du zentzurik, inkestek eta egindako ikerketek erakusten baitute bisitari asko berariaz joaten direla udalerri euskaldunetara eta euskara ikustea eta entzutea gustatzen zaiela».

Hori guztia gogorarazteko eta kanpainaren berri emateko, UEMAko kide diren udalerrietako merkatariei eta ostalariei eman zaie ekimenaren berri. Merkataritza zerbitzua UEMAk eskaintzen duen herrietan, posta arruntez jaso dute informazioa 2.000 biztanletik beherako herrietan. 2.000 biztanletik gorako udalerrietan, udalek banatu dituzte informazio-orriak.

Eskuorria, gainera, denda, taberna eta jatetxeen ate eta erakusleihoetan itsasteko moduan diseinatu dute, eta euskaraz aritzeko oinarri-oinarrizko hiztegia ere badauka, QR kode bat eskaneatuz eskura daiteke. Gazteleraz, katalanez, frantsesez, ingelesez eta galizieraz dago hiztegia. Kanpainaren berri emateko iragarkia ere prestatu du UEMAk, bisitariek taberna eta jatetxeetan aurkituko duten mahai-zapiaren osagarri.