Euskaldun izatearen sentimenduari buruzko dokumentala, Durangon

Amaia Hormaetxeak eta Endika Basagurenek AEBetako San Frantzisko, Los Angeles, Chino, Las Vegas eta New York hirietan egindako 'Txipli txapla pum Amerikatik. A basque story from the USA' lana estreinatuko dute maiatzaren 11n Durangoko Arte eta Historia Museoan, 19.00etan.

Hormaetxea psikologo sanitarioa eta psikoterapeuta da, eta Basaguren berriz, artista plastikoa. Biek osatzen dute proiektua, Euskal Herriaren eta diasporaren arteko topaketa artistiko eta kulturala sortzea helburu duena, euskal tradizioen irakurketa garaikidea eginez. Dokumentalak biek bisitatu zituzten AEBtako euskal zentro eta komunitateetan bizitako esperientzia artistikoak erakutsiko ditu, baita hiriguneetara egindako sartu irtena ere, eta Wall Streeteko zezenaren eskulturaren ondoan edo Brooklynen egindako performanceak.

Lanaren arduradunek jakinarazi dutenez, bideo performancetik dokumental esperimentalera doan ikus entzunezko proiektua da hori. Euskal kulturari buruzko egitasmoa da, eta kulturari dagokionez mugarik ez egotearen kontzeptuaz hitz egingo da.

Bizkaiko Foru Aldundiaren eta Euskal Hezkuntza Erakundearen laguntza izan duen proiektuak euskararen sentimendu tradizional bat kontatzen du, Chino edo San Frantzisko bezalako komunitateetatik hasi, eta euskalduna izatea eta maitatzea esan nahi duenaren ikuspegi garaikideago bateraino, Elisabeth Macklin New Yorkeko poetaren figuran gorpuztuta.

'Txipli txapla pum Amerikatik' proiektuak datorren udan jarraituko du AEBetako ekialdeko kostaldeko beste erkidego batzuetan izan den euskararen erabilera lantzen.

• Temas
• Las Vegas
• Los Angeles
• Euskera