Txapelketa Nagusiko lehen faseak asteburuan jarraituko du Gotaine-Irabarnen eta Gasteizen

Pasa den asteburuan Getxon eta Arrasaten izan ziren Bertsolari Txapelketa Nagusiko lehenengo saioak. Alaia Martin jaun eta jabe izan zen Bizkaiko udalerriko agertokian eta Joanes Illarregi, berriz, Arrasateko bigarren kanporaketan. Baina txapelketak aurrera darrai eta lehen fase horren hirugarren eta laugarren saioak jokatuko dira asteburu honetan (17.00etan). Gotaine-Irabarnen (Zuberoa) izango da saioa larunbatean, urriaren 1ean, eta Gasteizen biharamunean, hilaren 2an. Sarrerak eskuragai daude bertsosarrerak.eus atarian.

Bertsozale Elkateak jakinarazi duenez, Gotaine-Irabarneko herriko gelan izango da saioa larunbatean, eta Ane Labaka Mayoz, Eneko Lazkoz Martinez, Julio Soto Ezkurdia, Nerea Ibarzabal Salegi, Oihana Iguaran Barandiaran eta Patxi Iriart Hiribarren ariko dira kantuan. Saioaren gidaria Aritz Bidegain Aire izango da.

Igandean, bestalde, Gasteizko Europa Biltzar Jauregiko Maria de Maeztu aretoan izango da saioa, eta Amaia Iturriotz Etxaniz, Haritz Mujika Lasa, Iban Urdangarin Lardizabal, Manex Agirre Arriolabengoa, Miren Artetxe Sarasola eta Xabat Galletebeitia Abaroa elkartuko ditu. Oier Azkarraga Grajalesek izango du oraingoan saioa aurkezteko ardura.

Bi saioetako irabazleak zuzenean sailkatuko dira finalaurrekoetara, eta beste bertsolariek, berriz, puntuazioaren arabera izango dute horretarako aukera. Esan bezala, saioak 17.00etan hasiko dira eta ordubete lehenago irekiko dira ateak, 16.00etan. Esan bezala sarrerak bertsosarrerak.eus atarian eskura daitezke, eta saioen egunetan, 15.00etan zabalduko da txarteldegia.

Bertsozale Elkartearen laguntzaile da Euskal Irratiak, eta larunbateko Gotaine-Irabarneko saioa zuzenean jarraitzeko aukera eskainiko du. Bertsoa.eus atarian ere izango da entzungai, Euskal Irratien lotura honen bidez.

Hori nahikoa ez balitz, finalaurrekoetatik aurrera zuzenean jarraitu ahal izango dira saio guztiak bertsoa.eus atarian, eitb.eus atarian zein ETB4 katean, besteak beste.

• Temas
• Euskera
• Bertsolari Txapelketa Nagusia