Murrayk LeBron James suntsitu du Kawhi eta Jordanen itxura hartuz

Jamal Murray pertsona diskretua da. Kanadarra delako izango da. Zaratarik egin gabe NBAko erreferenteetako bat da. Bere taldeak partidak eta txapelketak irabaztea eragiten duen pertsonetako bat. Ez ahaztu, Nuggetsak egungo txapeldunak dira. Jokicek dena eklipsatzen du, baina Murrayk ere erru handia du Coloradokoen arrakastan. Bere ezkutaririk gabe, irudi bitxiko serbiarrak ez luke eragin bera izango jokoan.

Lakersen aurkako play offetako kanporaketak argi utzi du Murrayren garrantzia Mike Maloneren taldearentzat. 4-1eko emaitzarekin, Coloradokoek oporretara bidali dituzte LeBron, Davis, Reaves eta besteak. Baina ez zen arraroa izango orain 3-3 gelditzea eta zazpigarren partida batean dena jokatu behar izatea. Eta horietan hobe da James erregearen aurka ez joatea. Egoera honetan are gehiago hazten dira Akroneko hegoak.

Baina bigarren partida Murrayk irabazi zuen ezinezko saskiratze batekin Davisen muturretan eta dena aldatu zen. Murrayk Kawhi Leonardek Raptorsekin 2019ko Ekialdeko finalean egindako jaurtiketa gogorarazi zigun. Nuggetsak hogei puntugatik galtzen ari ziren bigarren laurdenean, Murrayk gaizki hasi zuen partida. Bere lehen 16 jaurtiketetatik hiru bakarrik sartu zituen. Baina Denverrekoak hobetzen joan ziren, eta ta desabantaila horretatik errekuperatu ziren. «Taldekideek esan zidaten botatzeko, nigan konfiantza zutela», esan zuen gero Murrayk. Eta funtzionatu zuen. 99ra berdindu arte arraun egin zuten, eta Murrayk kolpe hilgarri bat eman zion azken segundoan, 101-99 irabazteko. «Nire kideen meritua izan da, ez nirea. Jendeak txalo egiten zuela entzun dut lurretik. Horregatik jakin dut barruan zegooela. Merezi genuen, taldekideen lanak merezi zuen».

Eta Kitchenerren jaiotako eskoltari hori guztia gutxi iruditu izan balitzaio bezala, bosgarren partidaren azken txanpan Michael Jordanen itxura hartu zuen 'The Shot' mitikoaren kopia batekin kanporaketa ixteko. 'The Shot' mugimendu sinplea eta defendaezina da erasotzailearen konfiantza hodeien gainetik dagoenean.

Hain erraza da, hitzez ere azal daitekeela. Botea erabiltzen da jaurtiketa librearen marra alboan leku bat bilatzeko, suspentzioan salto eginez eta 'swosh'. Reaves saiatu zen saskia eragozten. Ez zegoen zer eginik. Milioi bat aldiz ikusi dugu jokaldia, bainazken segundoan egitea partida berdinduta dagoenean beste gauza bat da.

Nuggetsek titulua errepikatu nahi dute eta Murrayk eta Jokicek maila honetan jarraitzen badute zaila izango da hori saihestea.

Eta orain? Ajea al dute Denverrekoek Lakersen aurka bizitako farraren ostean? Baliteke. Timberwolvesen kontrako finalerdietan lehenengo bi partidak galdu dituzte. Oso erraz irabazi dute Minnesotakoek, 106 puntu partida bakoitzean lortuta. Nuggetsak aldiz ez dira 100era ere iritsi.

• Temas
• NBA
• Euskera
• Harmailatik (Sergio Eguia)