Eguzkiak ez du jada berotzen Phoenixen

Badugu NBAko play offetik at geratu den lehen super taldea: Phoenix Suns. Durant, Booker, Beal eta Nurkic dituen talde beldurgarria oporretan dago. Timberwolvesek erratza atera dute Arizonakoak 4-0 kaleratzeko. Eta Minnesotakoak mendebaldeko finalerdietan daude jada.

Berriz ere frogatzen da izar batean garrantzitsuena ez dela distira, baizik eta haren masak haren ondoko espazioa nola kurbatzen duen. Edo, erraz azalduta: partidak nork irabazten dituen.

Inork ez du zalantzan jartzen Devin Booker Kobe Bryanten oinordeko naturala dela. Argi dago Grand Rapidsen jaiotako eskolta berriak NBAko eraztunen bat irabaziko duela erretiroa hartu aurretik, izan ere, 27 urte baino ez ditu. Baina mundu errealean norbaitek dirudiena eta denaren arteko aldea handia da. Bookerrek super izarra dirudi. Edwardsek, ordea, super izar bat bezala jokatzen du.

Larry Birden esaldi ospetsua desitxuratuz, garaipenak jendea Michael Jordanez mozorrotzen denean etortzen dira. Eta horixe egin du Anthony Edwardsek Timberwolvesentzat play offeko lehenengo kanporaketan.

Laugarren partidan lortutako 40 puntuez gain, defentsako lana izan da garrantzitsuena. Bookerren 49 puntuak edo Duranten 33 puntuak anekdota huts bezala geratu ziren. Kevinek berak onartu zuen partidaren ondoren. «Edwards da jokatzen ikustea gehien gustatzen zaidan jokalaria».

Bai, banekien konturatuko zinetela. Birden esaldia «gaur jainkoa Jordanez mozorrotu da» izan zen. Airek Gardenen 53 puntu sartzen ikusi ondoren bota zuen. Askok gogoratzen ez dutena da egun hartan Bullsek galdu egin zutela.

Eta inork ez dezala pentsa Sunsen porrota kasualitatea izan denik. Kritikak asko irainduko ditu Phoenixekoak. Litekeena da udan eskualdaketa asko ikustea eta frankiziak bere burua berriz asmatzea. Hirugarren partidan, zaleek txistu egin zioten taldeari Footprint Centerreko harmailetatik.

Baina gertatu dena gauza guztiz normala da denboraldi erregular osoari begiratzen zaionean. Minnesotakoak Mendebaldeko lehen postuetan egon dira denbora guztian eta beldurra ematen duen taldea dira. Izatez, Anthony Edwards ez da bere benetako izarra. Ohore hori Karl Anthony Townsentzat da. Eurekin batera, Estatu Batuetako ligako defendatzailerik onenetarikoa dago, Rudy Gobert frantziarra. Mike Conleyren zuzendaritza ere bikaina da.

Chris Finch entrenatzaileari arazo bat bilatzeagatik...: ez du txandakatze handirik egiten. Zortzi jokalarik bakarrik hartu zuten parte azken partidan. Nahiz eta partidurik txarrena eraman zuena entrenatzailea bera izan zen. Antolatzailearekin estropezu egin eta tendoi errotuliarra hautsi du. NBAn gertatzen ez dena...

• Temas
• Euskera
• Harmailatik (Sergio Eguia)