En Tol Sarmiento musika taldeak 15 urte bete ditu oholtza gainean

En Tol Sarmiento musika taldeak 15 urte bete ditu oholtza gainean. Izan ere, musika banda esanguratsu hau Arabar Errioxan jaio zen 2005. urtean. Lehendabiziko taldearen egitura Iñigo Etxezarreta eta Ruben Campinun gitarristek eta Floren Nuela bateriak osatu zuten. Hilabeteak igaro ahala, Campinunek gitarra jotzeari utzi eta baxuaren testigua hartu zuen, taldeari musikaltasun hobea eskaintzeko helburuarekin.

Urte batzuk geroago, Jorge Bujo izeneko tronpeta-jolea batu zitzaizkien egitasmora eta taldea Ska kutsu bat hartzen hasi zen. 2009. urtean, aldiz, Jabier Lucasen tronboia sartu zen taldean, gaur egun arte iritsi den egitura finkatuz: gitarra, bateria, baxua, tronboia eta tronpeta, hain zuzen. Dena den, arrazoi profesional ezberdinengatik, 2011. urtean Bujok taldea utzi eta Rubén Terreros tronpeta-joleak hartu zuen bere lekukoa.

Hamabost urte luzeotan sei disko kaleratu izan dituzte. 2008. urtean euren lehendabiziko diskoa plazaratu zuten, «Vendimia seleccionada» izenekoa. Egitasmo honek sei kanta aurkezten zituen. 2012. urtean, berriz, euren bigarren albuma argitaratu zuten. Logroñoko Sonovision Rock Lab estudioetan grabatutako 'Hacia la Luna' lanak 13 kanta zituen. Album, honetan izen handiko hainbat musikari esanguratsuk hartu zuten parte, hala nola, Iñaki Ortiz de Villalbak (Betagarri) eta Enrique Villarealek 'El Drogas'.

Ondoren, ska-reggae-rock estiloko beste bi disko etorri ziren: 'Mundua' eta 'Beldurrik ez' (2015). 2017ko azaroaren 28an ETS taldeak 'Ametsetan' euren bosgarren diskoa atera zuen. Hau Gasteizko jaietan grabatutako zuzeneko diskoa da eta bere jarraitzaile leialak aintzatesten dituzte bertan. Azkenik, euren azken eta seigarren albuma 2019. urtean ailegatu zen, 'Aukera Berriak', izenekoa. Gainera, taldearen musika ibilbide oparoan 2015. urteko Araba Euskaraz eguneko abestia edota 2019ko Herri Urratseko kantua konposatu dituzte.