Ruben Ruizen 'Pellokeriak' ipuin-bildumak irabazi du Mikel Zarate saria

Ruben Ruiz idazleak (Gasteiz, Araba, 1973) idatzitako 'Pellokeriak' ipuin-bildumak irabazi du 2024ko Mikel Zarate haur literatura saria. Hala erabaki du Leire Bilbaok, Maribel Aiertzak eta Xabier Mendigurenek osatutako epaimahaiak, eta, horren ondorioz, egileak 3.000 euro jasoko ditu. Sariaren antolatzaileek jakinarazi dutenez, liburua Elkar argitaletxeak kaleratuko du.

'Pellokeriak' hainbat ipuin laburrez osaturiko kontakizuna da, denetan Pello izeneko mutikoa dela protagonista. Ipuin horietan zehar hainbat gai agertzen dira, hala nola eskola, familia, bullying-a, zahartzaroa eta beste, denetan nabarmentzen direla umorea eta samurtasuna.

Orotara hamaika lan lehiatu dira aurten, eta horien artean Ruizek idatzitako ipuin-sorta hautatu du epaimahaiak. Sariketa Lezamako Udalak eta Elkar argitaletxeak sortu zuten, Bizkaiko udalerriko seme eta euskal kulturako sortzaile eta bultzagile handi izandako Mikel Zarateren omenez, eta hamaikagarren ekitaldia izan da aurtengoa. Lur Gallastegik irabazi zuen duela bi urte, eta epaimahaiak hutsik utzi zuen saria iaz.

Ruben Ruiz 1973an jaio zen Gasteizen eta Nafarroako Basaburua udalerrian bizi da gaur egun. Irakaslea da lanbidez, eta hainbat libururen egilea, hala nola 'Anekdotak' haur literatura ipuin-bilduma edo 'Beti mugan' abenturazko lana.

• Temas
• Euskal Literatura
• Euskera