'Romi' telesailaren filmaketak trafikoari eragingo dio Areetan

Ostiral honetan, urtarrilaren 12an, Areetako hainbat kale itxi egingo dituzte, Inés París zuzendari eta María Cerezuela eta Natalia Millán protagonista dituen Romi fikziozko thrillerraren filmaketa dela eta. Filmaketa ostiraleko 17.30etik larunbateko (hilak 13) 01.30era egingo da.

Getxoko Udalak informatu duenez, Las Mercedes kaleko trafikoa erabat moztuko da, 1 eta 6 zenbakien artean, 17.30etik 20.30era, gutxi gorabehera. Evaristo Txurruka kalera sartu nahi duten ibilgailuak Paulino Mendiviletik desbideratuko dira. Dena den, Las Mercedes kaleko tarte horretan bizi diren pertsonek baimena izango dute garajeetara sartzeko.

Gainera, Evaristo Txurruka kaian aldizkako mozketak egingo dira, 4 zenbakiaren parean, 6 atariaren kanpoaldean sekuentzia bat egiteko, eta gunean espazioa eta bide publikoaren okupazioa erreserbatuko dira ekoizpen-etxearen ibilgailuetarako eta materialerako.

Argiteria publikoari dagokionez, ostiraleko 17.30etik larunbateko 03.00etara bi argi itzaliko dira: Evaristo Txurruka kaiko 6 zenbakiko eraikinaren fatxadakoa eta Las Mercedes kaleko 3 zenbakikoa.

Udaltzaingoa bertan egongo da herritarren gaineko eraginak ahalik eta txikienak izan daitezen kontrolatzeko.

Romi Mediaset-en telesail originala da, eta María Cerezuela aktore barakaldarra du protagonista, emakumezko aktore berri onenaren Goya saria irabazi zuena, Maixabel filmagatik. Katearen fikzio berri hau Showrunners: Aula de Ficción talentu gazteen promoziorako programaren lehen edizioan hautatu zen.

Romina Goitia Romi (María Cerezuela) entzumen-desgaitasuna duen detektibe pribatu gaztea da, hitzik gabeko komunikazioa interpretatzeko eta gezurra antzemateko gaitasun paregabea garatu du, eta aurkezten zaizkion kasuak ebazteko trebetasun handia du. Kasuak ebazteko eta bere helburuak lortzeko legezkotasunaren inguruan ibiltzeko joerak loa kentzen dio amari, Alaiari (Natalia Millán), Ertzaintzan ikuskatzaile lan egiten duenari.

Bilboko eta Bizkaiko hainbat agertokitan filmatzen den telesaile honetan, Edurne Azkarate, Unax Ugalde, Elena Irureta eta Asier Etxeandia aktoreek ere parte hartzen dute.

• Temas
• Mediaset
• Getxo
• Euskera
• Euskal Literatura