'Le piano du lac' musika eta dantza ikuskizuna, asteburuan Landako Parke Probintzialean

Asteburu honetan ikuskizun bereziaz gozatzeko aukera izango dugu Arratzuan dagoen Landako Parke Probintzialean 19.00etatik aurrera. Izan ere, Delphine Coutant abeslari, piano-jotzaile eta biolin-jotzaileak, Daniel Trutet biolontxelo-jotzaileak eta Mónica Cofiño dantzariak musika- eta dantza-ikuskizun berezia prestatu dute, musika ur gainean joz eta dantzatuz.

Ikuskizun honek ibilbide luzea du dagoeneko, bost urtez Frantziatik erakusten ibili direlako, guztira, 170 emanaldi baino gehiago eginez. Iaz, Frantziatik beste leku batzuetara hedatzea erabaki zuten, eta Belgikan, Espainian eta Portugalen bira egiten ibili ziren. Kontzertua urtegian bertan izango da, ikusten ez den plataforma flotatzaile baten gainean, eta bertaratzen direnak ertzeetatik entzuteko eta ikusteko aukera izango dute. Poesia eta dantza bateratu egiten dira.

Delphine Coutantek, berez, biolina ikasi zuen, baina abeslari eta konpositore gisa ere lan egin du, musika eta antzerkia bateratuz. Naturarekin lotura handia du, eta hori dela eta, esaterako, zuhaitz batean esekita ere jo du. Daniel Trutetek ibilbide luzea du biolontxeloa jotzen, eta 'Cellodan' da bere proiektu nagusia. 'Cellodan' izena cell (biolontxeloa) eta Dan (Daniel musikaria bera) hitzen bidez sortu zuen, biolontxeloaren eta musikariaren arteko dualitatea adierazteko. Azkenik, Mónica Cofiño, dantzaria, performer eta ikuskizunen ekoizlea da. Dantza klasiko-espainola ikasi zuen Madrilgo Dantza Kontserbatorio Profesionalean, eta geroago Budapest, Viena, Berlin eta Bruselako eskola eta antzokietan ere ikasi zuen.

• Temas
• Berlin
• Viena
• Budapest
• Bera
• euskera