Paul Urkijo, 'Irati' filmaren zuzendaria, euskal zinemaren egoeraz ariko da Bilbon

Paul Urkijok euskal zinemaren egungo egoera ezagutzeko aukera emango digu maiatzaren 6an, bere esperientziatik abiatuta. Interesdunak 9.30ean hasiko diren tailerretara hurbildu ahal izango dira, hau EHUko Bizkaia Aretoan egingo delarik. Lanaldiak bost orduko iraupena izango du.

Urkijo 'Irati' eta 'Errementari' filmen zuzendaria da, mundu fantastikoa maite duen zinemagilea, alegia. Otsailean zinemetan estreinatutako 'Irati'rekin publikoaren saria eta efektu bereziak irabazi zituen Sitgeseko zinemaldian, eta nahiz eta aurtengo Goya sarietan ere hainbat kategoriatan izendatu zuten, ez zuen bakar bat ere irabazi.

Izen handiko zuzendari honekin egindako hitzordura itzuliz, esan behar dugu ekimena 'Sormen Ola' ekimenaren barruan kokatzen dela, 'Loraldia' jaialdiak duela urtebete sortu zuena. Programa honen helburuak dira, besteak beste, gazteen sormena eta orientazioa profesionalizazioaren munduan, kultura-aniztasunaren hedapena, sormen-espazioen eskaintza eta gazteen euskarazko harremak sustatzea. Saioak urtarrilean hasi ziren eta 16 eta 29 urte bitarteko gazteei zuzenduta daude.

Tailer bakoitza sormenaren hainbat esparru jorratzen dituen gai bati buruzkoa da eta gai ezberdinak lantzen dira, besteak beste, dantza, musika, arte eszenikoak, literatura, ikus-entzunezkoak eta irudiak. Saioak erreferentziazko profesionalek eta esperientzia dutenek eskaintzen dituzte.

Ildo horretan, Paul Urkijoren ikus-entzunezkoen jardunaldiaren ondoren, maiatzaren 27an, Miren Amuriza bertsolariak eta Amaia Egidazu ilustratzaileak sormena hitzetatik eta iruditik lantzeko aukera eskainiko dute. Saioak doakoak izango dira Bizkaiko campuseko ikasleentzat, eta horietako bakoitzaren kostua 15 eurokoa izango da unibertsitateko ikasleak ez diren parte-hartzaileentzat.

• Temas
• Euskera
• Zinema