Parodiaren bideetatik

Javier Rojo

Sábado, 2 de mayo 2020, 21:09

Comenta

Joxean Agirrek literatura idazten duenean, irakurleek denbora dibertigarria pasa dezaten nahi du, hauxe da bere helburu nagusia, eta oinarrizko planteamendu hau ezin da bazterrean utzi 'Nobela errealista bat' bezalako idazlan baten aurrean gaudenean. Denbora dibertigarria pasatzeko parodian rrotzen den umorea du lanabesik garrantzitsuena. Eleberri honen kasuan protagonista taxizalea da, eta bere bezeroei abertzaleen istorioak kontatzeko ohitura du: bezeroa nolakoa izan, halako istorioa kontatzen dio taxian aireportutik behar den lekura daraman bitartean. Taxizalea, gizon heldu xamarra, ezkonduta dago, baina ezin esan daiteke bere bizitza oso zoriontsua denik, emazteak maitalea du-eta. Argumentua gorabehera handirik gabe aurrera doa narratzailearen papera ere jokatzen duen taxizaleak istorioak eta anekdotak kontatzen dituelarik. Baina eleberriaren izaera aldatzen da emaztearen maitalea, idazle bat, modu arraroan hiltzen denean. Momentu horretan, argumentuak bihurgune errokanboleskoa eginda, idazle hori idazten ari zen nobela bukatu beharko du protagonistak, haren heriotzaren gorabeherak argitzen dituen bitartean.

Thriller politiko poliziakoaren parodiara lerra-tzen da liburua. Jakina, parodia denez, honelako literaturan ohikoak diren topikoak erabiltzen dira edonon. Hor agertuko da ikerketan laguntzaile moduan neska gazte panpoxa, protagonistaren fantasia erotikoak piztuz. Hor agertuko dira gaizkile arriskutsuak, eta borrokak… Bestalde, narratzailearen elukubrazioen artean nobelagintzari buruzko teoria moduko bat agertuko da, joko metaliterariorako aukera ere ematen duena.

Nobelak, beraz, elementu desberdinak nahasten ditu, irakurlea dibertitzeko helburu argiarekin. Edonola ere, umorea erabiltzen denean, kontuz ibili behar da errepikapenekin. Abertzaleen anekdoten sorta hain luzea da, ia amaigabea, argumentuarekin erlazio argirik ez duten istorioen segida izanik gainera, non azkenean, dibertigarria izateari utzi gabe ere, pixka bat nekagarria gerta daitekeen nobela hau.