Rio de Ororen Karabana Solidarioa martxan doa Saharako errefuxiatuei laguntzeko

Euskal gizartea eskuzabaltasunaren eredu izan da berriz ere. Errefuxiatuei laguntzeko martxan jarri zen Karabana Solidarioaren kanpainak, larunbat honetan, 27an, bideari ekingo dionak, herritarren alderik oparoena erakutsi du beste behin ere. Izan ere, asko izan dira Saharako Tindufeko kanpalekuetan dauden pertsonei oinarrizko beharrak asetzeko dinamika horretan parte hartu dutenak. Rio de Oro Durangaldea izan da eskualde horretan proiektua antolatu eta koordinatu duena. Gobernuz Kanpoko Erakunde horretatik aditzera eman dutenez, Bilbotik aterako diren 3 trailerren artean 80 tona elikagai inguru eramango dituzte Saharako kanpamenduetara.

«Gaur egungo osasun egoerak proiektuaren kudeaketa zaildu badu ere, Rio de Oro oso pozik geratu da herritarren, erakunde publiko guztien eta proiektuan parte hartu duten gainerako erakundeen inplikazioarekin», adierazi dute.

Aipatutako Karabana solidarioa Alicantera joango da, eta, bertan, Oran helmuga duen ferry batean sartuko dira. Handik Fronte Polisarioko arduradunak arduratuko dira kargatutako ibilgailuak saharar errefuxiatuen kanpalekuetara eramateaz.

Durangon batutako merkantziaren artean, guztira, 24.934 kilo elikagai izango dira, bai eta konpresak, arropa eta fardelak barne. Datu ekonomikoei erreparatuz gero, guztira 39.713,15 euro bidaratuko dira Saharako errefuxiatu horiei laguntzeko.

«Ezarritako helburu guztiak gainditu dira eta lortutako emaitzak espero zirenak baino hobeak izan dira. Funtsak biltzeko kanpaina arrakastatsua izan da, euskal herriaren inplikazioari esker, beste behin ere erakutsi baitu saharar herriarekiko duen elkartasuna», gaineratu dute Rio de Orotik.

Bertatik jakinarazi dutenez, halaber, trailerraz gain, 4x4 auto bat bidaliko dute Auserdeko Hezkuntza Bereziko eskolara, ikasleak garraiatzeko balioko duena. Izan ere, eskola horretan daude Rio de Orok udaran hartzen dituen haurretako batzuk.