Euskal diaspora aztertuko duen ikertzailea hautatzeko deialdia egin dute Nevadako Unibertsitatean

Nevadako Unibertsitatean euskal diaspora aztertuko duen ikertzailea hautatzeko deialdia egin dute Etxepare Euskal Institutuak eta Nevadako Unibertsitateak lankidetzan. Berez, hilabeteko ikerketa-egonaldia izango da, Jon Bilbao katedraren barruan, eta asmoa da ikertzailea abuztutik abendura bitartean han izatea. Hala ere, gaur egungo osasun-egoeraren arabera erabakiko da azken data.

Eskaera aurkezteko epea jadanik hasi da eta azken eguna martxoaren 3a izango da. Inprimakia hemen bertan eskura daiteke. Deialdiaren izena 'Jon Bilbao 2021 ikertzaile gonbidatua' da eta Renon dagoen Nevadako Unibertsitatean emango duen hilabetean, besteak beste, deialdian jasotzen den ikerketa-proiektua gauzatuko dute.

Horrez gain, euskal diaspora ikertzeko truke-eremuak ere garatuko ditu, lankidetza-aukera berriak bilatzeko eta ideia berritzaileak egiteko. Bestalde, hango unibertsitatean euskal diasporari buruzko sare bat sortzeko eta indartzeko aurrerapenak sustatuko ditu.

Besteak beste, topaketak, hitzaldiak eta jarduerak antolatuko ditu AEBko akademian eta gizartean euskal diaspora ezagut dezaten, eta komunikazio-estrategia bat garatuko du hango arduradunekin, proiektua eta sortutako ezagutza zabaltzeko.

Parte hartu nahi duenak zenbait baldintza bete beharko ditu, eta horien artean daude doktorea izatea, unibertsitateko irakaslea edo ikertzailea izatea, euskal diasporaren inguruko ikerketan esperientzia izatea, azken 4 urteetan Jon Bilbao katedraren ikerketa-egonaldirako laguntzarik jaso ez izana, eta ingeles-maila egokia izatea (gutxienez, B1 maila). Deialdiari buruzko informazio gehiago nahi izanez gero, sakatu hemen.

• Temas
• Nevada (EEUU)
• euskera