Nekatoeneako egonaldi artistikoan esku hartzeko deialdia zabalik da

Hendaiako Nekatoeneako baserriko egonaldi artistikoan esku hartzeko deialdia zabalik da. Egitasmo hauxe Euskal Kultur Erakundeak, Euskal Itsasbazterreko zentroak eta Euskal Idazleen Elkarteak antolatzen dute eta Euskal herriko idazleentzat bideratutako proiektua da, Iparraldeko nahiz Hegoaldeko idazleentzat, hain zuzen ere. Hala, interesa duen euskal idazle orok ekainaren 6ra bitarte izena emateko aukera dauka, jfrahier@hendaye.com helbidera bere hautagaitza bidaliz.

2020ko nahiz 2021eko edizioan bezalaxe, hautatutako hiru sortzaileek Getariako Elkano Fundazioak ikertutakoaren gainean idatzi ahal izango dute, datu berriak erantsiz, noski. Hori dela medio, Juan Sebastian Elkano euskal esploratzailea eta marinel ospetsua aintzatesteko parada izango dute berriz ere, munduko lehen itzuliaren 500. urtemugaren baitan.

Aurtengo egonaldian nobedade gisa, Juan Sebastian Elkano eta lehen mundubira honek izan dituen ondorioak edota izan dituen eraginen inguruko hausnarketa bat egitea proposatzen zaie egonaldian hautatutako sortzaileei.

Nahiz eta deialdia euskaraz idazten duten idazleei bideratuta joan, euskara hizkuntzaz gain, literatura sorkuntzak Juan Sebastian Elkanorekin zerikusia duten gai bat baino gehiago izango du hizpide, hala nola, nabigazioa, esplorazioa, aurkikuntza, kartografia, astronomia edota ontzigintza.

Egonaldi hauxe 2022ko urritik abendura bitartean ospatuko da, eta hilabete baterako 1.500 euroko beka emango diete. Egonaldia bukatu ondoren, Hendaian eta Getarian topaketak antolatuko dira hautatuekin batera.

• Temas
• Hendaya
• Euskera