'Miñan' eta 'Ene herri txikia' liburuen pasarteak irakurriko dituzte, Gasteizen

'Miñan' eta 'Ene herri txikia' liburuen pasarteak irakurriko dituzte asteazkenean, uztailaren 20an, Gasteizen. Emanaldia Gasteizko Irakurle Klubak antolatu du Ignacio Aldekoa Kultur Etxeko Liburutegian, eta 19.30etik 21.30era iraungo du. Sarrera doan da, baina bertaratu nahi izanez gero, izen-ematea egin ahalko da aldez aurretik. Horretarako, mezu bat bidali beharko da irakurlekluba@geuelkartea.eus helbidera.

Iban Zaldua euskal idazleak koordinatzen du jarduera, eta irakurketaz gain, irakurritako liburuaren inguruko eztabaida eta solasaldia antolatzen dira. Normalean, ordubete eta erdiko saioak izaten dira gutxi gorabehera. Hogei urte bete zituen iaz Gasteizko Irakurle Klubak eta dagoeneko 200 liburu baino gehiago irakurri dituzte.

Irakurriko duten lehen pasartea Donibane Lohizuneko Amets Arzallus euskal bertsolari eta kazetariaren 'Miñan' liburukoa izango da. Susa argitaletxeak 2019ko azaroaren 8an kaleratu zuen, eta hor, Ibrahima Baldek Gineatik Europara egindako bidaia kontatzen da.

Ibrahima kamioia gidatzen ikasten ari zen Ginean eta egun batean bere bizitza goitik behera aldatu zen. Anaia txikia falta zela adierazteko deitu zion amak, eta haren bila joan zen Europara. Tarteka, egarria, gosea, mina eta bestelakoak bizi izan zituen; horiek guztiak Amets Arzallusi kontatu eta 'Miñan' liburuan jaso zituen bertsolariak.

Lehen irakurketa hori amaitutakoan, Gaël Fayek idatzitako eta Irati Bereau Baleztenak euskaratutako 'Ene herri txikia' liburuaren txanda izango da. Igela argitaletxeak kaleratu zuen liburua 2019ko urriaren 9an, eta Burundiko herri txiki batean bizi den Gabriel da protagonista. Bere bizitza zeharo aldatzen da gurasoak banantzean batik bat, eta, gainera, istiluak ugaritzen ere hasten dira bere herrian, hutuen eta tutsien arteko gerra tarteka.

• Temas
• Euskera
• Euskal Literatura