Indie? Zer da indie?

Galdera hori egiten diogu geure buruari musikazaleok azkenaldian: zer da indiea gaur egun? Eta, Espainian behintzat, uste dut erantzuna badaukadala: indiea jada ez da existitzen. Hala esan zidan, behintzat, lehengoan La Bien Queridak egunkari honetan egindako elkarrizketan.

Abeslari bilbotarrak argi eta garbi utzi zuen aspaldi 'mainstream' ak bereganatu zuela indiea: diskoetxe handiek, multinazionalek eta industria komertzialenak. Hau da, musikari independenteen artean sortutako mugimendua merkatuak kontrolatzen du maila masiboan gaur egun.

Indiea 80ko hamarkadan sortu zen Estatu Batuetan, 'zuk zeuk egin' mugimenduarekin lotutako korronte gisa, sektoreko konpainia handiei planto egiten ziena. Eta espiritu horrek bizirik dirau Ipar Amerikan, talde edo artista jakin batek izan dezakeen inpaktu komertzialaren gainetik produktuaren kalitatea lehenesten duten konpainia diskografiko alternatiboei esker.

Europan, ordea, azken urteotan gauza txikiak egiteko espiritua erabat galdu da. Baita autokudeaketa ere. Garai batean, 90eko eta 2000ko hamarkadetan, indie estiloko artistak modetatik isolatutako musika konposatzen saiatzen ziren, baita industria aldatzen ere, edo, behintzat, saiatzen.

Gauza gutxi geratzen da horretatik, Espainian behintzat; izan ere, merkatuak denbora darama indie etiketa jaialdi masiboetarako beste genero bat bezala ustiatzen, eta gitarren poparen azpigenero gisa erabiltzen, mugimenduaren jatorrizko espiritutik oso urrun. Ona den guztia bezala, indiea lausotu, galdu eta desagertu egiten da.