Metro erdiko dortoka arraroa aurkitu dute Hego Amerikan

Azterketa genetiko baten ondorioz, Chelus generoko dortoka espezie bat baino gehiago dagoela jakin dute zientzialari batzuek. Hain zuzen ere, Hego Amerikan aurkitu duten metro erdiko ale arraroak hori erakutsi die adituei. Orain arte espezie bakarra zegoela uste zuten, baina Orinoko eta Amazonas ibaien arroetan dauden matamata dortokak (Chelus fimbriata) desberdinak zirela konturatu ziren, eta haien konposizio genetikoa aztertzeari ekin zioten.

Horrela, DNAren 75 lagin erabili zituzten, eta aldez aurretik zeuden hipotesien aldean, bai genetikoki, bai morfologikoki desberdinak diren bi matamata dortoka zeudela ondorioztatu zuten. Espezie berriari Chelus orinocensis esan diote, hain zuzen ere, Orinoko eta Rio Negro ibaien arroetan bizi delako. Lehendik ezagutzen zen Chelus fimbriata espeziea, berriz, Amazonas ibaiaren arroan bakarrik bizi da.

Diotenez, Miozeno berantiarrean banandu ziren bi espezieak, duela 13 milioi urte inguru. Aro horretan, antzinako Amazonas-Orinoko arroa bitan banatu zen, aurkikuntza berriari esker gaur egun ezagutzen ditugun biak sortuz. Horrenbestez, uretako hainbat animalia-espezie ere bereizi egin ziren, eta genetikoki aldatzen hasi ziren adierazitako garaian.

Orain arte matamata dortoka ez zuten hartzen desagertzeko zorian zegoen espezietzat, baina egindako ikerketaren ondorioz, bitan banatu direla jakiterakoan, konturatu ziren espezie bakoitzaren populazioaren tamaina uste zena baino nabarmen txikiagoa dela. Horrez gain, urtero, dortoka arraro hauek animalien legez kontrako merkataritzan salerosten dira.