Mariolein Sabarte, Etxepare-Laboral Kutxa Itzulpen Saria, 'Amek ez dute'ren itzulpenagatik

Euskaraz idatzi eta argitaratutako literatur lan baten itzulpenpena saritzeko asmoz sortu zuten Etxepare-Laboral Kutxa Itzulpen Saria, eta bertan obraren itzulpena eta argitaletxearen sustapena baloratzen dira. Oraingoan, lehiaketaren zortzigarren edizioan, Mariolein Sabarte Belacortu itzultzaile herbeheretarrak lortu du golardoa, Katixa Agirreren 'Amek ez dute' eleberria gaztelaniatik nederlanderara itzultzeagatik, eta Zirimiri Press argitaletxeak plazaratu du lana.

Ostiral honetan egin zen sari emate ekitaldia Bilboko Bidebarrieta Kulturgunean, eta han izan ziren Bingen Zupiria Eusko Jaurlaritzako bozeramaile eta Kultura eta Hizkuntza Politikako sailburua, Irene Larraza Etxepare Euskal Institutuko zuzendaria, Jokin Gorriti Laboral Kutxako ordezkaria, Mariolein Sabarte itzultzailea, Henrike Olasolo Zirimiri Press argitaletxearen editorea eta Katixa Agirre idazlea. Epaimahaiak Mariolein Sabartek eta Zirimiri Press argitaletxeak alor horietan egindako sustapen lana nabarmendu zuen.

«Itzulpena kalitate handikoa izateaz gain, itzultzailearen ibilbide sendoa aitortu nahi da sari honekin, bizitza osoan egindako lana, hain zuzen«, azpimarratu zuen epaimahaiak.

Bestalde, Zirimiri Press argitaletxearen ibilbidea ere saritu nahi izan dute, «euskal lanak zehazki eta hizkuntza gutxituetakoak orokorrean itzultzeko egindako apustu garbiagatik». Eleberria sustatzeko egindako «lan sendoa» ere aintzat hartu dute, Herbehereetako hedabideetan oihartzun handia izan baitu argitalpenak. «Argitaletxeak lan handia egin du hori hala izan dadin», azaldu zuten.

Etxepare-Laboral Kutxa Itzulpen Sariaren zortzigarren edizioaren epaimahaikide izan dira Jokin Gorriti Laboral Kutxako ordezkaria, Imanol Otaegi Euskal Kultura Sustatu eta Hedatzeko Etxepare Euskal Institutukozuzendariak, Elizabete Manterola eta Naroa Zubillaga EHUko irakasle eta EIZIEko kideak eta Mikel Lasa Etxepare Euskal Institutuko komunikazio teknikaria.

Ohi bezala, 4.000 euroko sari bakarra eman da, itzultzaileak eta argitaletxeak erdibana banatzeko. Halaber, 2.000 euroko laguntza jasoko dute irabazleek saria jasotzera Euskal Herrira etortzeko edo literatur lana argitaratu den herrialdean sustapen lanekin jarraitzeko.

• Temas
• Bingen Zupiria
• Euskera
• Euskal Literatura