Leitzan erabakiko da azken final-laurdena

Nafarroako Bertsolari Txapelketako azken final-laurdena erabakita geldituko da larunbat honetan. Lehen faseko azken saioa Leitzako Herri Aretoan, 17.30ean, ospatuko da. Ander Aranburu gai-jartzailea dela, bertan izango dira kantuan Eneko Lazkoz, Josu Sanjurjo, Bittori Elizalde, Endika Legarra, Saats Karasatorre eta Fernando Ziganda.

Saioan puntu gehien biltzen duen irabazlea zuzenean sailkatuko da finalaurrekoetako faserako. Dagoeneko txartel hori eskuratu dute Sarai Roblesek, Julio Sotok eta Joanes Illarregik. Hauek Iruritako, Vianako eta Uharteko saioak irabazita, hurrenez hurren.

Lau saioetako lau irabazleekin batera, beste 14 bertsolari ere izango dira finalaurrekoetan, final-laurdenetako faseko sailkapenaren araberakoa. Hain zuzen ere, larunbateko Leitzako saioa bukatuta jakingo dira horien izen-abizenak.

Leitzan bertatik bertara ikusi nahi duzu bertso emanaldia? Sarrerak salgai daude bertsosarrerak.eus atarian. Finalaurrekoen fasea azaroaren 4an abiatuko da, Altsasun izango da hitzordua. Lehen saio horren ondoren, beste bi saio ere izango dira: azaroaren 11n Agoitzen eta 19an Lesakan. Horietan erabakiko da finalean ariko diren zortzi bertsolarien zerrenda. Final erraldoia abenduaren 2an ospatuko da, Iruñeko Anaitasuna kiroldegian hain zuzen ere. Txapela nork jarriko duen zuzenean ikusi nahi baduzu, dagoeneko sarrera eros dezakezu. Bertsozaleak zorioneko daude, aurretik egun interesgarriak aurkezten zaizkielako eta bertsolariek, oholtza gainean, dena emateko irrikitan daudelako.