Laukizko Beheko Eskola mendeurrena ospatzen ari da, bere historia eta ondarea omentzeko

Aurten 100 urte betetzen dira Beheko Eskola sortu zenetik, eta, bere mendeurrena dela eta, hezkuntza-erakundeak, Laukizko Udalaren laguntzarekin, hainbat ospakizun jarduera antolatu ditu urte osoan zehar garatzeko. «Ekimen hauetan, ikasle ohiak, irakasleak eta eskola osatu duten pertsona guztiak izango dira protagonista», esan dute bere arduradunek.

Euren hitzetan, Bizkaian gaur egun ere funtzionatzen duen auzoeskola zaharrena da. «1925ean inauguratu zenetik, Beheko Eskola tokiko hezkuntzaren erreferente izan da, denboran zehar eboluzionatzen eta gizarte zein hezkuntza aldaketetara egokitzen jakin duelarik. Bere lana funtsezkoa izan da euskararen eta euskal kulturaren irakaskuntzaren sustapenean, laukiztarren belaunaldiak formatuz».

Momentuz egin diren ospakizun ekitaldiak ihauteriak, Santa Ageda eta Emakumearen Nazioarteko Egunean izan dira, eta etorkizunerako aurreikusitako ekitaldien artean daude: bideo oroigarria, azken 100 urteotan eskolatik igaro diren ikasleen parte-hartzearekin; argazki erakusketak, eskolaren bilakaera mendeurrenean erakusteko; ate irekien jardunaldiak, ikasle eta irakasle ohiek gelak bisitatu eta oroitzapenak partekatzeko, eta solasaldiak eta mahai-inguruak, ikasle eta irakasle ohien parte-hartzearekin, hezkuntzaren garrantzia eta Beheko Eskolaren ondarea aztertzeko.

Laukizko alkateak, Gorka Elgezabalek, mendeurren honen garrantzia eta herriarentzat duen esanahia azpimarratu nahi izan du: «Beheko Eskolaren 100 urteak ospatzea, gure komunitatearen hezkuntza eta formazioan lagundu duten guztiak omentzea da. Eskola hau ez da soilik ikasteko lekua izan, baizik eta balioak, kultura eta nortasuna transmititzeko gunea ere. Ospakizun hauek bere historia aitortzeko eta hezkuntzarekin dugun konpromisoa berresteko aukera bat izatea nahi dugu».