Lau estreinaldi, otsaileko ostegunetan ospatuko den Lautan Hiru jaialdian

Antzerkia, euskal errealitatea esploratu eta erakusteko balioko duten euskarazko obrak sustatzeko eragile dinamizatzaile gisa. Premisa horrekin, otsaileko ostegunetan ospatuko den Lautan Hiru antzerki jaialdiaren zazpigarren edizioak Bilboko Alde Zaharrean giro euskalduna sustatu eta, bide batez, euskal antzerkigileei euren lanak erakusteko plaza berriak eskainiko dizkie.

Andres Urrutia euskaltzainburuak eta Eider Inunziaga Bilboko Udaleko Euskara zinegotziak astearte honetan Euskaltzaindiaren egoitzan egindako aurkezpenean adierazi dutenez, «guztira zortzi ekitaldi eskainiko dira La Sinsorga, Kalderapeko, BIRA, Cafe Bar Bilbao, 7 Katu gaztetxe eta Euskaltzaindiaren egoitzetan».

Era berean, «mugarri gisa, obren erdiak jaialdi honi esker ekoitzitako estreinaldiak» izango direla nabarmendu dute: zehazki, XXII. Café Bar Bilbao-Tartean sarietako testu saridunarekin eginiko irakurketa dramatizatua; 2024ko Lautan Hiru laguntza eskuratu zuen 'Alferrak, tunanteak, maleanteak' ikuskizuna; 7Katu gaztetxearekin batera egindako 'Errealitatearen harribitxiak' pieza; eta Jokin Oregik zuzendutako 'Arima eta Bihotza' (Lezoko Antzerki Testu Laburren II. Lehiaketan lehen saria).

Urrutiak positibotzat jo du Alde Zaharreko kultur eragileekin izandako lankidetza eta «pozik» agertu da «antzerkigileei plaza berriak eskaintzeaz eta Bilboko Alde Zaharrean euskal giroa zabaltzeaz gain, euskarazko antzezlanak ekoizten lagundu dugulako».

Jakina denez, 14 eta 40 minutu arteko formatu txikiko lanak egongo dira ikusgai Lautan Hiru jaialdian, eta iaz 'Antzerkiaren gorputza-gorputzaren antzerkia' ardatz izan bazuen, aurten gazteek egiten duten antzerkiari erreparatuko dio, 'Gazte gara gazte eta ez dugu (zuen) antzerkia maite' lelo zirikatzailea baliatuz.

Gazteria aldaketarako eragile gisa ulertzen duen lelo hori aprobetxatuz, Inunciagak azaldu du «denboraren poderioz euskarazko antzerkiaren berpiztea bizi izan dugula». Izan ere, «hizkuntza biziberritzen eta belaunaldi berriei irisgarri egiten lagundu diguten hainbat obra eta konpainia sortu ditugu. Horrek, arte eszenikoetan euskararen erabilera sustatzeaz gain, euskal nortasun kulturala indartu du».

Euskaltzaindiak Bilboko Udala, Tartean konpainia, BIRA Kulturgunea eta 7Katurekin batera elkarlanean antolatutako Lautan Hiru jaialdira bueltatuz, interesdunek jakin behar dute aurten ez dela bonurik salduko, eta emanaldi bakoitzak 4 euro balioko duela. «Sarrerak egunean bertan erosi ahalko dira, ikuskizuna ematen den espazioan zabalduko baitira leihatilak, ordu bete aurretik», esan dute.

Gainera, aurten ere Ikusle Klubaren esperientzia errepikatuko da, non ikusleek antzerkigileekin hitz egiteko aukera izango duten. Hots, egun bakoitzeko azken ikuskizuna amaitu ondoren, antzezle edo zuzendariekin hitz egiteko aukera egongo da, Euskal Herriko Antzerkizaleen Elkartearekin (EHAZE) kideek gidatutako solasaldi batean.

• Temas
• Euskera