'Lanbroa' fantasiazko film laburra nagusi, 14. Korterraza jaialdian

Kultura Kalean! Elkarteak antolatuta, uztailaren 20tik 22ra bitartean egin dute Korterraza, hau da, Gasteizko Film Laburren Jaialdiaren 2023ko edizioa. Artium Museoaren kanpoko terrazan, ikusgai izan dira hautaketa batzordeak aukeratutako proiektuak, eta hiria girotuz, gainera, sei talde aritu dira musika kontzertuak eskaintzen.

Bada, lehiaketa egunak bukatuta, 14. ekitaldia izan duen hitzorduko irabazleak jakinarazi dituzte Gurutze Beitia eta Susana Soleto aktoreek eta Aitor Lopez de Aberasturi zuzendariak osatutako epaimahaiak. Sail ofizialeko Alex Angulo Saria, 500 euroko ordainsaria duena, lurraldean ekoiztutako film labur batek irabazi du: Aitzol Saratxaga bizkaitarraren 'Lanbroa' lanak. KIMUAK 2022 bilduman hautatua izan ostean, FANT Bilboko Zinemaldi Fantastikoan, ICOFF-GASTEIZ jaialdian eta Gaurik Laburrena ikus-entzunezko maratoian parte hartu du.

Otsailaren 27an ireki zuten 14. edizioa izango denean parte hartzeko deialdia, eta maiatzaren 18ra bitartean izan zuten sortzaileek beren lanak bidaltzeko aukera. Inskripzio-epea bukatuta, denera, 1.123 film labur jaso zituzten jaialdiko arduradunek, eta aire zabaleko proiekzioen lehiaketaren hautaketa batzordeak 35 proiektu aukeratu zituen. Horiek, Korterraza Araba zirkuitu ibiltariaren baitan, lurraldeko hainbat herritan erakutsi dituzte ekainaren 26az geroztik.

Antolatzaileek jakinarazi dutenez, guztira, 9.000 pertsona inguru hurbildu dira 14. edizioko film laburrak eta kontzertuak ikustera, hala, Xabi Vitoria Kultura Kalean! elkarteko kideak jaialdia arrakastatsua izan dela aitortu du: «Kulturaren festa handia izan da».

• Temas
• Euskera
• Zinema