Klima-aldaketaren ondorioz energia berde gutxiago sortzen da

Australian egindako ikerketa baten arabera, klima-aldaketaren ondorioz, eguzki-parkeetan eta parke eolikoetan energia berriztagarri gutxiago sortzen da. Australian hain zuzen ikertzea erabaki dute, han, muturreko fenomeno meteorologiko ugari gertatzen direlako, hala nola basoko suteak eta haize-ekaitzak. Horrela, klima-aldaketak, parke horietan sortzen den energia kantitatearen emaitzak okerragotzen dituela egiaztatu dute.

Ikertzaileek klimarekin zerikusia duten zenbait aldagai garrantzitsu aztertu zituzten, hala nola tenperatura, lurrazaleko eguzki-irradiantzia eta haizearen abiadura, 30 minutuko tarteetan, 1980. urtean hasiz eta 2060. urtean amaituz (aurreikusitako datuak izango dira, noski).

Diotenez, oro har, eguzki-energiaren eta haize-energiaren urteko sorkuntzak aldaketa txikiak izaten dituen arren, urteko bost egunik berotsuenetan, klima-aldaketak energia berriztagarriaren sorkuntzan duen eragina nabarmen handiagoa da. Egun horietan energia-eskaerarik handiena egoteaz gain, prezioak ere maximoak izan ziren, eta eguzki-energiaren sorkuntza % 0,5 eta % 1,1 artea txikiagotu zen. Bestalde, parke eolikoen ekoizpena % 1,6 eta % 3 artean murriztu egin zen.

Australiako bi tokietan ikertu bazuten ere, tenperaturak energia berriztagarriaren sorkuntzan duen eragina beste toki batzuetara ere heda daiteke. Klima-aldaketak, eskualdearen arabera, eragin handiagoak edo txikiagoak izango ditu. Horrenbestez, diotenez, beste eskualde batzuk ere aztertu beharko dituzte, baita beste alderdi batzuk ere, hala nola energia-sistemak.

• Temas
• Klima
• euskera