Eroskiko lana uztetik Glory kickboxing liga ospetsuan lehiatzera

Ez dakigu inoiz bizitzak zer ekarriko digun, eta horregatik gure ametsen alde egunero borrokatu behar dugu. Bestela, galde iezaiozue Aitor Ibañez 'Currito' kickboxer bilbotarrari (27-7-1, 13 KO), duela bi aste Eroskiko apal-hornitzaileko lana utzi eta egun gutxira bizitza aldatuko zion deia jaso zuenari: Gloryrekin sinatu du, munduko kickboxing ligarik ospetsuenarekin, eta, horrela, bertan parte hartuko duen lehen euskal borrokalaria izango da.

Bi urteko kontratua sinatu ostean, 24 urteko Bilbo Zaharreko kirolari ezker hau Japoniako Yokohama Buntai estadioan izango da ekainaren 21ean, 'Azken Luma Pisua Zutik' ekitaldian parte hartzen. Baina gauzak ez dira inoiz kasualitatez gertatzen, eta altuera jauziko Euskadiko txapeldun ohia izandakoa -nerabezaroan atletismoan ibili zen-, Portugalen, Armenian, Frantzian eta Abu Dhabin ringera igo ondoren iritsiko da Gloryko kickboxing gau horretara. Hain zuzen ere, Abu Dhabin mundu mailan ezagutzera eman zen, KO ikusgarri batekin lehen roundean garaipena lortu ondoren, Anass Ahmidouch Gloryko borrokalari ospetsuaren aurrean.

Bere ibilbide profesionalari buruz galdetzen diotenean, Portugalgo Luis Africanoren aurkako borroka ere datorkio gogora: «Buakaw, Superbon eta bestelako mitoekin borrokatzetik zetorren kickboxerra zen, eta lehia ikusgarria egin ondoren irabazi nion», dio harro. Halaber, bere debut profesionala ere «berezia» izan zela gogoratu du, «WAKO txapeldun bati etxetik kanpo aurre egin niolako, lehen roundean KO bidez irabazteko». Eta nola ahaztu iazko azaroan parte hartu zuen Marsellako 'Night Of Champions' txapelketa ospetsua, non lau aldiz munduko txapeldun izandako Remy Parraren aurka aritu zen finalean. «Puntuetara galdu genuen, baina borroka oso estua izan zen, eta Aitorrek lan bikaina egin zuen», azaldu du Jose Luis Idarraga 'Josito', bere entrenatzaile eta managerra.

Hala ere, dena ez zaio beti hain ondo joan Etxebarriko Élite Sport gimnasioko borrokalariari, eta «gogortasuna eta erresilientzia» behar izan ditu azken urteetan aurrera egiteko. Duela urte batzuk Benidormen izandako borroka profesional batean eskua lesionatu zuen eta bi urtez ezin izan zuen borrokarik egin. «Mediku askorengana joan behar izan nuen eta kortisona, plasma eta beste tratamendu batzuk hartu nituen. Oso garai gogorrak izan ziren, baina merezi izan du, orain iritsi zaiguna ikusita», dio.

Eta zer espero dezake Gloryko lehenengo borrokak irabazten baditu? Idarragaren arabera, «hasierako borroketan, seguruenik, 6.000 eta 8.000 euro artean kobratuko du lehia bakoitzeko, eta gero, emaitzen arabera, 20.000 euro ere irabazten has daiteke».

Ekainaren 21eko Japoniako ekitaldiari dagokionez, Gloryko sustatzaileek duela egun batzuk baieztatu zuten 'Currito'k (27-7-1, 13 KO) Ayoub Bourrass marokoarraren (15-2, 4 KO) aurka borrokatuko duela. Bestalde, aurreratu dute Bobo Sacko frantziarrak (77-6-1, 30 KO) André Santos (23-2, 10 KO) brasildarraren aurka lehiatuko duela lehia ikusgarri batean. Liga ospetsuko Marshall Zelaznik zuzendari exekutiboaren arabera, «pisu arineko kategoria kickboxing-eko zirraragarrienetako bat da».

«Umiltasunez eta zuhurtziaz goaz Japoniara. Badakigu munduko onenen aurka borrokatuko dugula, baina sinatu badugu euren artean gaudelako da», amaitu du Idarragak. Beraz, Bilboko borrokalari ezkertiar honi munduko zorte guztia opatzea baino ez zaigu geratzen. Ea ahalik eta gorenera iristen den.