Itzultze bat

Ondo gogoratzen dut Gorka Urbizuren 'Hasiera bat' diskoaren berri jakin nuen momentua. Instagram irekin eta hortxe zegoen hainbestetan itxaron izan nuen albistea. Album berri bat. Azkenean, lau urte luze eta gero, abesti sorta bat. Kontzeptu berria, baina betiko esentziarekin.

Abenduan egunkarian beti 'ariketa' bera egiten dugu kultura sailean: 'zein da urteko diskorik onena?'. Uzta ederra izan badugu ere, ez nuen zalantzarik izan. Lekunberriko musikariak disko kontzeptuala atera du, patxadaz egindakoa. Eta gaur egun, industria musikala dagoen moduan dagoela, ez da txikikeria bat.

Berri Txarraken gitarrak marmarka desagertu dira (baina nahi ditugunean haien diskografian topa ditzakegu beti). Hori bai, ezin ukatu Gorka Urbizuren esentzia hortxe jarraitzen duela. Letrek bere erraiak dituzte. Izan ere, diskoa lehen aldiz entzun nuenean ezin izan nuen 'Iraila' abestia burutik kendu. Nerabezaroko maitasunen kutsua dauka, baina heldutasunak ematen duen ikuspuntutik. Egun euritsurako soinu bandarik aproposena. Gero eta argiago daukat inork ez duela euskaraz bera bezain ondo konposatzen.

Ez dut zalantzarik izan bere diskoa goraipatzeko momentuan, baina argi dago urte ederra izan dela aurtengoa euskal musikarentzat. Izarok gabon kantekin osatutako lan batekin ustekabean harrapatu gaitu, eta bere lagun mina den Olatz Salvadorren erregistro berria ere txalotzekoa izan da 2024 honetan. Gainera 'Zainak eman' lanean biek bat egin dute 'Zerbaiten zain' abestian.

Pozarren ere jaso dut Süneren bakarkako lehen diskoa. 'Amain eman' Huntzaren osteko pauso hau oso interesgarria da. Puntu kontinuista badauka ere, melodia desberdinekin ere etorri zaigu Josune Arakistain. Nabarmentzekoa da Veintiuno taldeko Diego Arroyorekin egindako 'Hori bat'. Eta beste taldeekin egindako lanengatik ezagutzen genituen beste musikariek ere egin dute topo aurten. Marte Lasarte Skakeitan, Belako eta ETS bandetako kideek osatzen dute. Haien lehenengo zuzenekoan ezagutzeko aukera izan nuen eta haien abestiak dardo modukoak dira. Etorkizun oparoa izango dute.

• Temas
• Euskal musika
• Euskera
• Musika
• Buru-belarri