Irati Jimenezek Euskadi Literatura Saria irabazi du, 'Begiak zabalduko zaizkizue' saiakeragatik

Aurreko astean Euskadi Literatura Sarien lehenengo irabazleak ezagutu genituen, eta, ostiral honetan, falta ziren kategorietakoen garaileen berri eman dute Bingen Zupiria Eusko Jaurlaritzako Kultura eta Hizkuntza Politikako sailburuak eta Andoni Iturbe sailburuordeak, Bilboko Bidebarrieta Liburutegian antolatutako ekitaldian. Horiek horrela, Saiakera Euskaraz modalitatean, Irati Jimenez Uriarte saritu dute, 'Begiak zabalduko zaizkizue' (Elkar) lanagatik.

Alexander Gurrutxagak, Ane Miren Larrinagak, Aitor Zuberogoitiak, Katixa Agirrek eta Xabier Aierdik osatutako epaimahaiaren arabera, Irati Jimenezen (Mundaka, 1977) lan horrek «euskal literatura sistema eta euskal literatura kanona aztertzen ditu, besteak beste. Horretarako, esperientzia propioa, irakurketa ugari eta pentsamendu kritikoa hartzen ditu oinarritzat. Gainera, erreferentzia literario ugari eskaintzen dizkio irakurleari». Euren hitzetan, gainera, «hipotesi ausartak proposatzen ditu Jimenezek, testuak badu probokaziotik ere, eta nahi duenean badaki politikoki zuzena ez izaten. Aipagarria da irakurleari etengabe interpelatzeko egiten duen ariketa honengan gogoeta sorraraziz», diote.

Bestalde, esan bezala, 'Euskarazko Literatura Itzulpena' kategorian Koro Navarro Etxeberriak (Donostia, 1955) jaso du golardoa Ernest Hemingwayren 'Fiesta Eguzkia jaikitzen da' (Erein&Igela) obragatik. Aintzane Ibarzabalek, Idoia Gilleneak eta Idoia Santamariak osatutako epaimahaiak nabarmendu duenez, «lan honek San Ferminetako giroa azaltzeaz gain, gai ugari lantzen dituen liburu klasikoa da. Belaunaldi Galduaren lekukotasuna ematen du, baita giza harremanak, adiskidetasuna, maitasuna, inpotentzia, edota hainbat gizonez eta emakume batez osatutako kuadrilla baten bizimodua eta portaera jasotzen ditu ere. Baditu, gainera, erreportaje itxurako bidaiak eta pasarte hunkigarriak», esan dute.

Halaber, euren hitzetan, «hori dena nola kontatzen duen ikusita, eta liburuak duen balio literario handiari erantzuteko, itzultzaileak jatorrizko testuaren indarra eta bizitasuna ez galtzeko erabaki egokiak hartu ditu, euskarak dituen baliabide berezkoak baliatuta». Ildo horretan, «nabarmentzekoak dira elkarrizketen tonu egokia, erregistroa eta ahotsen txandakatzeak nola jaso dituen, eta bestelako pasarte narratibo eta deskriptiboen jarraipen erosoa, prosaren soiltasuna, zehaztasuna eta eraginkortasuna. Izan ere, esaldi luze korapilatsuen kadentziari eustea bezain zaila izan daiteke esaldi labur bidezko erritmo biziari eustea sinesgarritasun-apurrik galdu gabe eta jatorrizkotik ihes egin gabe», azaldu dute.

Bestalde, Gaztelaniazko Literatura, Euskarazko Literatura Itzulpena, Saiakera Euskaraz eta Saiakera Gaztelaniaz kategorietako Euskadi Literatura Sariak jasoko dituzte

Bestalde, azpimarratzekoa da Edurne Portela EL CORREOko kolaboratzaileak Gaztelaniazko Literatura Saria irabazi duela, eta Teresa Maldonadok Saiakera Gaztelaniazko modalitatean jaso duela golardoa.

• Temas
• Euskera