Klase-ordu gehiago, baina horiek prestatzeko denbora gutxiago

Espainiako irakasleak dira (eta, beraz, baita euskaldunak ere) EBko herrialdeen artean eskola-ordu gehien ematen dituztenak, azken txostenak dioen arabera. Batez beste, Lehen Hezkuntzan 854 ordu ematen dituzte ikasturtean, eta Europan, berriz, 703, hau da, %20 baino gehiago. DBHn eta Batxilergoan, gure irakasleek 656 ordu irakasten dutenean, arrakala ez da hain handia: %4koa eta %6koa, hurrenez hurren.

Halere, lanaldia Europakoa baino motzagoa da. Klaseak prestatzeko denbora, lanen zuzenketa, barne-koordinazioa, tutoretzak eta familiekiko komunikazioa kontuan hartzen baditugu, DBHko eta Batxilergoko azken mailako irakasle euskaldunek eta espainiarrek (horiek dira txostenak zehazten dituen ikasturte bakarrak) 1.406 orduko lanaldia daukate ikasturte bakoitzeko. EBn, berriz, 1.511 ordukoa da.

Datu hauek ikusita, agian gure ikastetxeen antolaketa birpentsa dezakegu. Adibidez, beharrezkoa al da gure curriculuma hain lodia izatea? Batez ere DBHn, non askoz eduki gehiago daukagun. Bestalde, noiz prestatzen dituzte klaseak irakasleek? Agian eskolaz kanpoko lanari ez diogu merezi duen balioa ematen.

Ez dut esan nahi irakasleen lanaldia luzeago izan beharko denik. Baina bai interesgarria litzakeela eztabaidatzea ea buelta bat eman beharko geniokeen gure sistemari, hobeto antolatzeko. Eta, batez ere, burokrazia murriztu behar da. Bai, planifikazioan, bai azterketen eta klaseko jardueren zuzenketan. Hala eskatzen dute klaustroek, burokraziak euren lanaldiaren zati handiegia kentzen dielako.

Eztabaida honetan irakasleei entzutea beharrezkoa dela uste dut, agian orain arte ez dugu hori hainbeste egin. Irakasle batek behin esan zidan bezala, hezkuntza-erreforma guztiak egin dira irakasleen ahotsa behar bezala entzun gabe.

• Temas
• Euskera
• Zorrozkailua