Hezkuntza, itsu-itsuan

Azken hilabeteetan, Imanol Pradales lehendakariak hainbat gauza esan ditu Hezkuntzari buruz. Legebiltzarrean, adibidez, berriro aipatu zuen gure ikasleen emaitzak hobetzeko beharra. Eta azaldu zuen itunpeko irakasleek eta irakasle publikoek diru kopuru bera jasoko dutela Hezkuntza Sailetik. Ikusi egin beharko da, hala ere.

Dena den, niretzat deigarriena beste ekintza bat izan da. Eusko Jaurlaritzak adituen batzorde bat jarri du abian, ebaluazio-sisteman aldaketak egiteko. Zertan datza? Oraingoz ez dakigu ia ezer. Sailak ez du argitu nortzuk diren aditu horiek, baina horietako batzuk EHUkoak, Mondragon Unibertsitatekoak, Ikuskaritzakoak eta Berritzegune Nagusikoak dira.

Hezkuntza-sistemak Espainia osoan bizi duen egoerari dagokionez, Euskadin ditugu daturik onenak. Isei-Ivei institutuak urtero hainbat ikerketa egiten ditu gure ikasleen maila akademikoa eta sozioekonomikoa ezagutu dezagun, besteak beste. Etapa erdiko Ebaluazio Diagnostikoa, adibidez, Estatu mailako daturik zehatzenak aztertzen dituen ebaluazioa da, zalantzarik gabe. Azterketa honetan 40.000 ikaslek baino gehiagok parte hartzen dute (LHko 6. mailako eta DBHko 4. mailako ikasle guztiek). Gero badaude PISA txostena, etapa amaierako ebaluazio diagnostikoa... Hainbat eta hainbat datu daude eskuragarri (baita Hezkuntza Sailak behin eta berriro atzeratzen duen txostenen argitarapena ere).

Zein da arazoa? Francisco Luna adituak behin baino gehiagotan esan duen moduan, Euskadin ebaluazio gehiegi dauzkagu, baina ez nahikoa ikerketa. Hau da, badakigu zein arlotan dauden arazo nagusiak, maila akademikoan behintzat (euskara ezjakintasuna, irakurketa-maila jaitsiera...). Baina ez dakigu zergatik gertatzen den hori guztia. Nolabait esateko, sintomak ezagutzen ditugu, baina ez gaixotasuna.

Orain, aditu batzordearekin, beste buelta bat emango diogu ebaluazioaren auziari? Zergatik ez bideratu ahaleginak ikerketa berriak bultzatzera? Zergatik ez dute gai hori jorratzen, adibidez, EHUko hiru Hezkuntza fakultateek? Ez al litzateke hobe jakitea zerk eta zerk ez duen funtzionatzen gure hezkuntza-sisteman, neurri aproposak hartzeko? Itsu-itsuan ez jarraitzeko, azken batean?

• Temas
• Imanol Pradales
• Hezkuntza
• Zorrozkailua
• Euskera