Igor Paskual, Glam-aren erregea

«Sarrerak zuk dituzu, ezta? Ez dut gogoratzen...». Lagunak baietz esan zidan, behin baino gehiagotan begiratu zuela. Duela bi urte asteburu honetan ikusi dugun kontzertu baten sarrerak erosi genituen. 2019eko abenduan, hain zuzen ere. Handik hona, badakizue: pandemia, aforo murrizketak, kutsatu kopuruen igoera, txertaketa kanpaina... Eta azkenean, Loquilloren kontzertua ostiralean izan zen. Bazen garaia. Baina bera ez zen gau hartako protagonista bakarra izan.

Kontzertua espero nuen baino gehiago disfrutatu nuen. Musikak ez du inoiz bere indarra galdu. Beti bezain boteretsua. Eta kasu konkretu honetan, Loquillo frontman galanta bada ere, ukaezina da Igor Paskual gitarra-jotzailearen xarma. Fokuak eta flashak berari zuzendu ziren. Rock and roll star hutsa. A ze planta!

Aitortu behar dut asko gustatzen zaidala eszenatokian luxuzko sekundarioak topatzea. Aldi berean protagonistak diren horietakoak. Eta horrelakoa da Igor Paskual. Bere bandarekin probokatzaile bikaina eszenatoki gainean, gitarra-jotzaile aparta eta konposatzaile fina. Eklektiko eta karismatiko hitzen mereziduna.

Duela hamar bat urte uda Ataunen igaro nuen. Gipuzkoako herri horretako familia baten etxean igaro nituen oporrak, euskara lantzen, 'Kutsidazu bidea, Ixabel'-en gertatu zen moduan. Hori bai, wifiarekin eta behi ongarria bildu gabe. Aste horietan izan nuen 'aitak' dokumental ugari egin zituen, baita abesti batzuk konposatu ere. Oso talentuduna zen, baina behin eta berriro esan zidan bere benetako arrakasta lagun trebe ugari izatea zela. Talde on baten sostengua ezinbestekoa dela irakatsi zidan.

Ataungo baserrian bizi den Txemak ez du Loquillo ezagutzen, baina abeslariak bere aholkua jarraitzen duela dirudi. Elkarrekin indartsuagoak gara. Eta hori izan zen Igor Paskualen papera. Zuzenekoan 'Rey del glam' abesten zuten bitartean, zalantzarik ez. Igor Paskual beti hurbil izan nahi duzun lagun hori da, glamaren erregea, alegia.

• Temas
• José María Sanz (Loquillo)
• Euskera
• Musika