Hiru milioi euro, euskal enpresetan adimen artifizialaren erabilera sustatzeko

Eusko Jaurlaritzak hiru milioi euro bideratuko ditu berriro aurten euskal enpresetan adimen artifizialaren ezarpena sustatzeko. SPRI Taldeak kudeatutako programa hori apirilaren 5ean hasi zen eta azaroaren 21ean amaituko da. Iaz, 86 enpresaren 96 proiektu lagundu zituen diru-laguntza kopuru berdina eskaini zuen ekimen horrek, eta, batez beste, 44.000 euro jaso zituen bakoitzak.

Jaurlaritzatik jakinarazi dutenez, laguntzaren helburua teknologia berri horren ezarpenean aurrera egiten laguntzea da, zerbitzuen sektoreetako edo merkataritza sektoreetako proiektuetan adimen artifiziala txertatzeko laguntzak banatuz, adibidez. Sektore horiek frogatu beharko dute adimen artifizialeko algoritmoak erabiltzen badakitela, 'machine learning' eta 'deep learning', besteak beste.

Laguntzak EAEn jarduera zentro bat duen eta adimen artifizialak erabiltzen hasi nahi duen edozein pertsona fisikori eta enpresari zuzenduta daude. Itzuli beharrik gabeko diru laguntzak 100.000 eurorainokoak izango dira.

Adimen artifizialaren esparruei buruzko ezagutza berriak eskuratzeaz gain, hardware eta software berrien erosketa finantzatu ahal izango da, baita aholkularitza, ingeniaritza eta antzeko zerbitzuak eskatu ere.

Azken helburua negozioaren produktibitatea hobetzea da. Horrela, euskal enpresek algoritmo aurreratuak erabiltzeko aukera izango dute beren etekinak hobetzeko, teknologia berri horiei buruzko ezagutza berriak eskuratzeko eta datu zehatzetan oinarritutako erabakiak hartzeko.

• Temas
• Eusko Jaurlaritza
• Euskera
• Inteligencia artificial