Hereguneko eztabaidak

Politika arte amaigabea da, etengabe aldatzen ari den gizartera egokitu behar da eta. Duela berrogei urte, data bat esatearren, inork ezin zuen pentsatu 2022an Internetera konektatutako mugikorren bidez komunikatuko ginenik. Edo biniloak berriro modan jarriko zirenik. Edo Ingalaterrako Isabel II.a erreginak bizirik jarraituko zuenik honezkero. Edo Espainiak ondo egingo zuenik Eurovisionen.

Baina, hala ere, politikan badira aldatzen ez diren eztabaidak. Egun hauetan monarkia edo errepublikaz hitz egiten da berriro. Errege emeritua Espainiara itzuli izanak eta irregulartasun fiskalei buruzko azalpenik eman ez izanak polemika berpiztu dute. Eta geure buruari galdetzen diogu: herritarrei galdetu beharko litzaieke gobernu-erari buruz? Erregeak Konstituzioan duen bortxaezintasuna berrikusi beharko litzateke? 84 urterekin itsasontzi batera igo ahal izango naiz ni?

Orain errepublikanoen fabrikatik independentisten fabrikara egingo dugu salto. Baziren batzuk jadanik, baina Ciudadanosek gehiago egotea proposatu du. Egun hauetan nazionalitateei buruz hitz egiten da berriro. Ines Arrimadasen alderdiak Konstituzioa aldatu nahi du erreferentzia hori ezabatzeko. Eta geure buruari galdetzen diogu: Espainia estatu plurinazionala al da? Konstituzioan nazioak aipatu behar dira? Gehiegi luzatzen ari den Felisucoren umorezko gag bat al da Ciudadanos?

Eztabaida errepikarien zerrenda honetan klasiko bat falta zen. Egun hauetan abortuari buruz hitz egiten da berriro. Lege berriak 16 urtetik aurrera haurdunaldia gurasoen baimenik gabe etetea ahalbidetuko du; orain, ordea, 18 urte behar dira. Eta geure buruari galdetzen diogu: 16 urteko neska batek abortatu dezake kontsultatu gabe baina ezin du botorik eman hauteskundeetan? Gurasoek ba al dute eskubiderik abortua eragozteko? Zenbat gizonek monopolizatuko dute eztabaida oraingo honetan?

'Bonus track' bezala, joan gaitezen Estatu Batuetara beste 'déjà vu' bat bizitzera. Egun hauetan armei buruz hitz egiten da berriro. Texaseko tiroketak armen kontrolari buruzko eztabaida piztu du beste behin ere. Eta geure buruari galdetzen diogu: sarbidea mugatu behar da? Zenbat tiroketa gehiago gertatu behar dira erabakiak behingoz hartzeko? Azken batean, zenbat aldiz ireki behar dira berriro hereguneko eztabaidak erabat ixteko?

• Temas
• Juan Carlos I de España
• Ciudadanos Partido de la Ciudadanía
• Politica
• Euskera
• Aborto
• Armas