Gozatu Bilbo Handiko eta Mungialdeko paronamika zoragarriaz Ganguren gailurretik

Gaurko ibilbidea Artxandako funikular maitean hasiko da. Eskuineko bideari jarraitu behar zaio, Trueba ikastetxetik igaro eta hurrengo biribilguneraino. Ondoren, ezkerrera biratu eta aurrera jarraitu behar da hurrengora arte. Han, Galdakaora doan errepidea hartu eta 250 metrotara dagoen El León jatetxeko aparkalekurantz abiatuko gara.

Eraikinaren atzealdean ate bat zeharkatu behar da Iturritxualde jolas-parkera sartu eta aurrera jarraitzeko. Jolastokia, bazkaltzeko mahaiez eta zuhaitzez inguratuta dago. Metro gutxiren buruan eta zabuen ondoren, bidea hiru aukera dituen bidegurutze batera iritsiko da. Hartu Avril mendira doan bidea, ezkerretara. Bertan, gainera, Gerra Zibilean hildako pertsonen hobi komunak daude, eta, beraz, interesatuek lekua aztertu dezakete.

Igoera labur baten ondoren, Avril mendiaren gailurrera desbideratze labur bat egin daiteke edo lubakietara hurbildu. Mendiaren izena Jean Jacques Avril jeneral frantsesari zor zaio, 1808ko independentzia gerran gobernadore izan zenaren omenez.

Lubakietan gudarien eta milizianoen batailoiek gerran matxinatu faxistei aurre egiteko erabili zituzten defentsa hauskorrak daude. Bi begiratoki ikusiko dituzu, bata ezkerrean eta bestea eskuinean, Asua bailarara, eta bestea Bilbo eta Basaurira begira.

Ez dugu ahaztu behar egiten ari garen ibilbidea zamudiarren ibilbidea eta Donejakue Bidearen parte ere badela. Jaitsiera labur baten ondoren, bi monumentu megalitiko atzean utzitakoan, aurrean aurkitzen den atea eta errepidea gurutzatu behar dira Gangurenera igotzeko. Tarte txikia da, apur bat zorrotza, baina laster iristen da gailurrera.

Iritsi ondoren, igo pixka bat gehiago eta antenak eta eraikina dauden tokira iritsiko zara. Handik Bilbo Handia eta Mungialdea ikus daitezke, Galdakaotik Santurtziko porturaino, eta Larrabetzutik Sopelaraino. Antenak igaro bezain laster, ezkerreko bidea hartu. Bertan Zamudio jartzen duen kartel txiki bat dago eta behera jaitsiko zara El Viveroraino.

Handik Bilbora itzultzeko hainbat bide daude: Lezamara jaitsi eta trena hartu, salto batean Etxebarriko bidea hartu, eta handik oinez edo garraio publikoan Bilboraino, edo Galdakaoko mendietako pista batetik jaitsi daiteke ere; pista hori hartzea gomendatzen dugu, ibilbide osoa egiteko. El Viveroko frontoia igaro bezain laster han dagoen pista bat hartu behar da errepide nagusiaren eskuinetara.

Jaitsierak ez du galtzeko arriskurik, baina lasterbide batzuk har ditzakezu marka urdin-gorriari jarraituz. Azkenik, bidea Urretako osasun zentroan amaitzen da. El Viverotik 45 minutu igaroko dira Galdakaora iritsi arte, eta handik itzultzeko hainbat aukera daude ere. Anbulatoriotik gertu dagoen autobusa hartzea iradokitzen dugu. Metrora doan autobus bat dago, Boluetara eramaten zaituena.

• Temas
• Artxanda
• Galdakao
• Bilbao
• Euskera
• Mendia