Gorka Urbizuren 'Hasiera bat' diskoaren aurkezpen birak Bilbon eta Gasteizen izango du geldialdia

Gorka Urbizu Berri Txarrak taldeko gitarrista eta abeslari ohiak bere bakarkako debuta izan den 'Hasiera bat' diskoaren aurkezpen birako datak iragarri ditu astelehen honetan. Musikariak sare sozialetan zabaldutako mezu baten bidez jakinarazi duenez, 'Tour bat' bezala izendatu du agertokietarako itzulera hori, eta lehen zuzenekoa Donostiako Intxaurrondo Kultur Etxean izango da otsailaren 23an. Bigarrena, bestalde, Bilboko Euskalduna Jauregian ospatuko diren Gaztea Sarietan eskainiko du bost egun beranduago, otsailaren 28an, alegia.

Horren ondoren, Gasteiz (Kubik aretoa, otsailaren 29a) eta Iruñea (Zentral, apirilaren 12a) iritsiko dira, Madril (Joy Eslava, apirilaren 19a), Bilbo (Kafe Antzokia, apirilaren 27a), Miarritze (Atabal, maiatzaren 18a), Bartzelona (Parallel 62, maiatzaren 25a) eta Azpeitiatik (San Agustin, ekainaren 7a) jarraitzeko. Sarrerak bi egun barru jarriko dira salgai 12.00etan gorkaurbizu.eus webgunean.

Berri Txarrak talde ospetsuak agur esan zigun 2019an, eta orain Urbizu 25 urteko ibilbideko abeslaria musikaren lehen lerrora itzuli da 'Hasiera bat' lanarekin, nahiz eta berarekin inoiz ez duen harremana eten, azken urteotan ekoizpen lanetan zein kolaborazioetan aritu baita, batez ere, beste esparru batetik sortzen saiatuz. Dioenez, hala heldu da 'Hasiera bat' lana: «kantuaren muinerako bidaia» eginda.

Hamar abestiko diskoa da, Teatre de ca l 'Eril (Guissona, Lleida, Katalunia) antzokian grabatua, 1904an eraikia, zortzi pistako mahai analogiko batean, Jordi Matas eta Joan Ponsen ekoizpenarekin. Urbizurekin batera Kataluniako hainbat musikari izan dira: Matas bera baxuan, gitarran eta baterian (azken hau 'Sute bat' kantuan bakarrik), Pons (bateria 'Janela bat', 'Maitasun bat' eta 'Besterik ez' abestietan), Ferran Palau (bateria 'Tren bat' eta 'Kolore bat' abestietan) eta Ildefons Alonso (bateria 'Toki bat', 'Teoria bat' eta 'Lilura bat' kantuetan).

Dagoeneko plataforma digitaletan entzun daiteke, eta nahi duen orok diskoa aurresalmentan jada eros dezake biniloan zein CDan eta martxoan jasoko du.

• Temas
• Berri Txarrak
• Euskera