Milioiak eta milioiak Europako defentsa-industriarako

Ohikoa da gerra munduko negoziorik errentagarriena dela entzutea. Eta aurrekariak ikusita, hala izan daiteke. Adibidez, Irak edo Afganistango gatazkan, Lockheed Martin defentsa enpresa izugarri aberastu zen AEBetako gobernuaren kontratuei esker. Baina zerrenda oso luzea da. Eta egungo ziurgabetasun egoeraren ondorioz, Europako defentsa-erakundeak etekinak lortzen hasi dira.

Arrazoia? Europako Batzordeak martxoaren 4an iragarritako berrarmatze plana. Ursula von der Leyen Batzordeko presidenteak esan zuen egitasmoaren helburua datozen lau urteetan 800.000 milioi euro mobilizatzea dela, Errusiaren mehatxuaren aurrean estatu kideen segurtasuna bermatzeko. «Garai arriskutsuak bizitzen ari gara, Europako segurtasuna arriskuan dago», aitortu zuen politikari alemaniarrak.

Eta hona hemen ñabardura garrantzitsu bat. Von der Leyenek ohartarazi zuen planak 150.000 milioi inguruko mailegu-mekanismo bat izango duela herrialdeentzat, baina kopuru hori egoitza Europan duten enpresetan gastatu beharko dela. Gainera, erositako produktuen osagaien % 65 gutxienez europarrak izan beharko dira.

Burtsak erakusten du Europako Defentsa sektorea inbertitzaileen arreta erakartzen ari dela. Urte hasieratik, EuroStoxxen balio gehien handitu duten hamar enpresetatik zazpi defentsarekin lotuta daude. Horien artean, Thyssenkrupp eta Rheinmetall alemaniarren akzioak %137,1 eta %121,6 hazi ziren, hurrenez hurren. Indra, akzioen % 28 dituen enpresa espainiarra, %55 igo da. JP Morgan banku estatubatuarraren arabera, hemendik aurrera «Europako defentsa enpresek azken 25 urteetan ikusitakoak baino salmenta eta etekin askoz handiagoak izango dituzte».