Go!azen-en biraren azken kontzertua, larunbat honetan, Amurrion

Go!azen telesailak arrakasta handia du haur eta nerabe euskaldunen artean. Programak 10 urte eta 100 atal bete ditu, eta, ospatzeko, Basakabiko lagunak bira berri batean murgildu ziren urtarrilean Arabako agertokietan. Ekitaldi hauei, dena den, amaiera emango zaie larunbat honetan, maiatzaren 25ean, Amurrio Antzokian.

Ikuskizuna Araba Euskarazen eskutik iritsiko da. Hirugarren urtez jarraian, Arabako ikastolen jaia Olarizuko zelaietan ospatuko da. Ekainaren 16an izango da lurraldeko zortzi ikastetxeak elkartuta, Mugaezin lelopean, eta hitzorduan lortutako dirua Oiongo San Bizente ikastolari laguntzeko izango da.

Aipatutako zentroetako bat Amurrion dago (Aresketa Ikastola), beraz, Go!azen kuadrillaren azken geltokia izango da bi saiotan: maiatzaren 25eko 17.00etan eta 19.00etan, eta sarrerak eskuratu nahi badituzu, salgai daude hemen. Aldez aurretik erosiz gero, tiket horiek 16 eta 18 euro bitartean balio dute; izan ere, leihatilan, emanaldiaren egunean bertan eta eskuragarri geratzen badira, prezioa 20 eta 22 euro bitartekoa izango da.

Esan bezala, Go!azen telesailak hamar urte bete ditu aurten, eta, hori gutxi balitz, 100. atala ere estreinatu da. Denboraldi honetan, Zuri jada ez da ikasle izango, begiralea baizik. Garazi ez da Basakabira joango ikasle moduan, baina bertan bukatuko du azkenean, aspaldiko etsai ezagun batengandik ihesi. Eta bitartean, Noak, Leak, Mattinek eta Saioak erronka zail bat gainditu beharko dute: haien musika taldea berpiztu behar dute institutura itzuli ahal izateko.