Gerediaga Elkarteak eta Durangoko Udalak Sormen Beka jarri dute martxan

Gerediaga Elkarteak eta Durangoko Udalak aurten berriro ere Sormen Beka jarri dute martxan. Aurtengoa egitasmoaren bigarren edizioa izango da. 2020. urteko Durangoko Liburu eta Disko Azokaren barnean emango dute aditzera zein izan den aurtengo proiektu irabazlea. Ekimen honek euskarazko sorkuntza sustatzea eta sortzaile berriei bidea erraztea du helburu.

Bekak kultur sorkuntzaren barruan Durangoko Azokak bere baitan hartzen dituen diziplina ezberdinak izango ditu kontuan: literatura, musika, arte eszenikoak eta ikus-entzunezkoak. Parte-hartzaileek aurkeztutako proposamena genero bakarra edota hauen uztarketa izan daiteke. Edonola ere, deialdi bakoitzean diziplina bat hartuko da oinarritzat.

Aurtengo deialdiak musika izango du oinarri, hauxe edozein generotakoa izan daiteke. Beka hau sortzaile berriei doa bideratuta, hau da, gehienez lan bakarra izan dezakete kaleratua. Deialdira banaka edo taldeka aurkeztu ahal izango dira, 18 urtetik gora izanez gero. Ekimen honek 15.000 euroko diru-laguntza eskainiko dio irabazleari aurkeztutako musika proiektua aurrera atera ahal izateko.

Proiektuak aurkezteko izen-emate epea jada zabalik dago eta irailaren 21a arte egongo da zabalik. Proposamen ezberdinak honako helbide elektronikora bidali beharko dira: gerediaga@durangokoazoka.eus. Bestalde, parte-hartzaileek aurkeztu beharko dituzten dokumentuak honako hauexek dira: eskaera formularioa, kurrikuluma eta portfolioa, proiektuaren memoria eta lanaren lagina mp3 formatuan.

Sormen Bekaren irabazlea aukeratzeko epaimahaiak zenbait irizpide hartuko ditu kontuan: proiektuaren kalitatea, originaltasuna eta hedatze ahalmena izango dituzte oinarri. Era berean, partaideek proiektuaren defentsa egin beharko dute epaimahaiaren aurrean.

• Temas
• Durangoko Azoka
• Durango
• euskera
• Becas educativas