Gazteentzako aholkularitza psikologikoa, Galdakaon

Zorionez, azken aldian osasun mentala zaintzeari merezi duen garrantzia ematen ari gara. Horretaz jabeturik, Galdakaoko Udalak gazteei euren ongizatea hobetzeko laguntza eta orientazioa emateko Batera doako psikologia zerbitzua jarri zuen martxan duela bi urte. «Espazio seguru horretan, beren kezkak adierazteko eta autoestimua, estresaren kudeaketa, bakardadea, familia harremanak, elikadura nahasmenduak eta abarrak hobetzeko behar duten aholkularitza eta arreta jasotzeko aukera dute herriko gazteek», diote ekimenaren arduradunek.

Batera programak aste honetan berrekin dio bere zerbitzuari, 12 eta 30 urte bitarteko gazteei beren egunerokotasunean dituzten zailtasunei aurre egiten laguntzeko. Adin tarte horretan dauden premien eta interesen aniztasuna kontuan hartuta, profesionalek adin tarte bakoitzari egokitutako arreta eskainiko dute.

Gainera, zerbitzuak berrikuntza garrantzitsu bat dakar oraingo honetan: «orientazio afektibo sexuala, udalerriko gazteen arteko harreman osasuntsuagoak, errespetuzkoagoak eta berdintasunezkoagoak bultzatzeko», diote. Indarkeria matxisten eta genero arrakalaren prebentzioan eta detekzio goiztiarrean erreferentziazko zerbitzua izateko asmoa ere du ekimenak.

Horrela, hemendik aurrera, Batera programako profesionalek bikote harreman gatazkatsuekin, genero identitate eta sexu aniztasunarekin, tabuekin, mito eta errealitateekin edo indarkeria matxistak konpontzearekin lotuta dauden kezka, bizipen eta arazoekin lagunduko diete gazteei.

Arreta pertsonalizatuko zerbitzua denez, hitzordua eskatu behar da 747 480 472 telefonoan edo batera@galdakao.eus helbidean kontaktuan jarriz. 12 eta 17 urte bitarteko gazteentzako saioak Aperribai, Plazakoetxe eta Indarra Topaguneetan izango dira, eta 18 urtetik gorakoek Torrezabal Kultur Etxeko lehenengo pisura joan beharko dute. Saioak astelehen eta astearteetan izango dira, arratsaldez.

Azken urteotan, Galdakaoko Udaleko Gazteria sailak ezohiko jarrera batzuk ikusi ditu adin tarte desberdinetako gazteekin egin ohi duen esku hartze hezitzailean. Izan ere, arazo globala da hori: gazte eta nerabeen antsietate eta depresio kasuak hiruzpalau aldiz biderkatu dira 2019az geroztik, eta jokabide suizidak %59raino igo dira. Era berean, indarkeria matxistaren eta, bereziki, adingabeen aurkako sexu indarkeriaren arloan, sexu delituen biktimen %40 adingabeak dira, gehienak neskatoak eta nerabeak. Gainera, nabarmentzekoa da adingabeek sexu askatasunaren aurka egindako delituen ehunekoak ere gora egin duela.

Hori dela eta, udaletik nabarmendu dute gazteei aholkularitza psikologikoa eta afektibo sexualerako zerbitzua ematea beharrezkoa dela, ahaztu gabe zerbitzuak genero ikuspegia txertatua izan behar duela. Batera zerbitzuak premia horri erantzuten dio, detekzio goiztiarreko eta arreta integraleko estrategiak ezartzeko esku hartze prebentibo espezifiko eta espezializatuen bidez.