Gatibu tropilaka

Gatibu uda da. Lagunarteko gauak. Txosnak, parrandak eta jai herrikoiak. Gatibu ere belaunaldi oso baten nerabezaroa da. Eta nire alboan izan dira urteak pasa ahala, bi hamarkada baino gehiagoko ibilbidean. Politena ilusioa nola mantentzen duten ikustea da. Musika berria sortzeko gogoa. Konformatzea ez da bidea, beti aurrera begira egotea baizik.

'EH Distopikala' izeneko disko berria atera du Gatibuk plataforma digitaletan. Eta diskoak eta kaseteak erosteko Durangoko Azokara arte itxaron behar da. Kaseteak, bai. Nahiz eta zaharra iruditu, moderno puntua ere baduela aldarrikatu zuten diskoaren aurkezpenean. «'Stranger Things' dela eta, modan jarri dira berriro», adierazi zuen Alex Sarduik barrez. «Gainera, beti kasetekin ibili gara, hasiera hasieratik. Beraz, zergatik ez?», gaineratu zuen Haimar Arejita gitarristak.

Gatibu soinua erraz ezagutzen da. Haien identitatea. Baina horrek ez du esan nahi beti gauza bera egiten dutenik. Bere estiloan, baina melodia berriak bilatzen dituzte. Azken disko honetarako gure mugetatik kanpo bilatu dute. Afrika eta Hego Amerika sentitzen dira zazpi abesti berri hauetan. Letrak askoz ironiko eta kritikoagoak dira gainera. Haizeak, perkusionista gehiago... Instrumentuen zerrenda luzatu egin dute. Zuzenekoetan ere? Denetatik egongo da. Kontzertu handietarako banda handia eramango dute, BECen iaz egin zuten bezala, baina areto txikiagoetan abestiak moldatuko dituzte. Beraz, interesgarriagoa izango da kasu honetan bi formatuak ikustea.

Martxoaren 18an BECen joko dute. Pandemiak Gatiburen kontzerturik bereziena suntsitu zuen, baina oraingoan ez da horrelakorik gertatuko. 7.500 sarrera inguru jarri dira salgai eta momentuz herena baino gehiago erosi dute zaleek. Udara arte Euskal Herrian emango duten zuzeneko bakarra izango da. Abisatuta zaudete. Egundoko jaia izango da. Hemendik beste hogei bat urtera gogoratuko dugun gau horietakoa.

• Temas
• Euskera
• Euskal musika
• Musika
• Buru-belarri