Garapenerako Lankidetzaren Euskal Agentziak bost proiektu lagunduko ditu Libano, Palestina, Siria, Etiopia eta Nigerian

Garapenerako Lankidetzaren Euskal Agentziak ekintza humanitarioko bost proiektu laguntzea onartu du, Libanon, Palestinan, Sirian, Etiopian eta Nigerian. Egitasmo guztiak krisi humanitarioen eraginpeko pertsonak babesteko esku hartzeak dira, eta bakoitzak, gehienez, 200.000 euro jasoko ditu. Gizarte erakundeek proiektuak aurkeztu dituzte, eta 13 ekimen kanpoan geratu dira, Garapenerako Lankidetzaren Euskal Agentziak jakinarazi duenez.

Ekainean onartu zen ekintza humanitarioko dekretu berriak lehenetsi egiten ditu gatazka testuinguruak eta epe luzeko bestelako indarkeria egoerak. Hala, onartu diren bost proiektuen artetik, hiru populazio palestinarrari zuzenduta daude: lehenengoa Nazioarteko Elkartasuna erakundearena da, eta Libanoko hegoaldean dauden iheslariei osasun zerbitzua eskainiko die, bereziki emakumeei; bigarrena Mundubat Fundazioarena da, eta Gazako biztanleriari laguntza psikosoziala eskaintzeko izango da; eta hirugarrena UNRWA erakundearena da, eta Siriako errefuxiatu palestinarrak bere beharrak asetzeko baliabide ekonomikoak izateko aukera ahalbidetuko du.

Beste bi proiektuak Unicefek eta UNHCR Iheslarientzako Nazio Batuen Goi Mandatariak gauzatuko dituzte: Nigeriako ipar-mendebaldean bakarrik dauden eta haien senideengandik urrundu dituzten adingabeei arreta integrala emango die lehen egitasmoak, eta bigarrenak baldintza nutrizionalak hobetuko ditu Etiopiako zazpi kanpamentutan dauden Hego Sudaneko haur iheslarien heriotza tasa murrizteko. Bestalde, Garapenerako Lankidetzaren Euskal Agentziak gogoratu du joan den irailaren 10ean atera zela ekintza humanitarioko estrategietarako deialdia eta espero duela ebazpena datozen hilabeteetan argitaratzea.

Euskal erakundearen arabera, gaur egun, krisialdiak gero eta sarriago gertatzen dira, denboran luzatzen dira eta pertsona gehiagori eragiten diete. Horregatik, eta prozesu parte hartzaile baten ondoren, Garapenerako Lankidetzaren Euskal Agentziak 2018-2023 aldirako Ekintza Humanitarioko Estrategia berria garatu eta ekainean dekretu berria onartu zuen.

Apustu estrategiko horretan aipatzen da, besteak beste, gatazka testuinguruetan eta indarkeriazko beste egoera batzuetako ekintza humanitarioetarako espezializazioa, GGKEei zuzendutako deialdiko proiektuak eta Garapenerako Lankidetzaren Euskal Erakundeak sustatutako ekimenak elkartzen dituena, hain zuzen. Horrela, ez du harritzen jakiteak Garapenerako Lankidetzaren Euskal Agentziak ekintza humanitarioko bost proiektu laguntzea onartu duela, Libanon, Palestinan, Sirian, Etiopian eta Nigerian.

• Temas
• Etiopia
• Libano
• Palestina
• Siria
• Nigeria