R.S. Faktor Basque taldearen kontzertua izango da laster Vital Fundazioa Kulturunean

R.S. Faktor Basque taldearen kontzertua izango da datorren asteartean, otsailaren 16an, Vital Fundazioa Kulturuneko A aretoan, 19.30ean. Kontzertua Astearte Musikalak programaren barruan antolatu da, eta bertaratu nahi izanez gero, sarrerak aldez aurretik erosi beharko dira, hemen, 5 euroan.

R.S. Faktor Basque taldea Ruben Salvador (tronpeta, flugel eta konposizioak), Julen Izarra (saxo tenorra), Satxa Soriazu (pianoa), Javier Mayor de la Iglesia (kontrabaxua) eta Hilario Rodeiro (bateria) musikariek osatzen dute, eta 2007. urtean sortu zen, taldeko kideak Musikenen, Euskal Herriko Goi-mailako Musika Ikastegiko Jazz sailean ikasten ari zirenean. Jazz espezialitatean Goi-mailako Lizentziatura eskuratuta, elkartzea eta ganbera-musikako talde bat sortzea erabaki zuten.

Harrezkero hainbat jazz jaialdi garrantzitsutan parte hartu dute, besteak beste, Gasteizen (34. edizioan), Donostian (45. eta 47. edizioetan), Salamancan, Burgosen, Elorrion, Araian eta 'Haizetara 2012' Kaleko Musikaren Nazioarteko Jaialdian (Zornotzan). Horrez gain, Euskadi, Errioxa, Galizia, Murtzia, Gaztela-Mantxa eta Gaztela eta Leongo Jazz Klubetan eta Kontzertu eta Antzoki Aretoetan ere kontzertuak eman dituzte.

Bestalde, musikariek beren aldetik beste musikari ezagun batzuen proiektuetan ere parte hartu dute, hala nola Iñaki Salvador, Mikel Andueza, Juan Carlos Perez, Gontzal Mendibil, Kiko Veneno, Pastora Vega, Bertso & Jazz, Mauri Sanchis eta Andreij Oleijniczakekin. Datorren asteko kontzertuan Ruben Salvador eta Hilario Rodeiro kideek konposatutako lanak interpretatuko dituzte.

• Temas
• Gontzal Mendibil
• euskera