EztanDA musikala!

Aurreko asteburuan La Mugako tabernari batekin egin nuen berba. Bilboko Zazpi Kaleetako Pintxo beganoen txapelketa ospatzen zen eta lehiaketarako garai ezin hobea zela esan zidan. Aurpegi arraroa jarri ote nuenez, berehala azalpena eman zidan. Normalean, Gabonak heldu baino lehen, askoz gutxiago saltzen dute, jendeak aurreztea erabakitzen duelako. Beraz, erakargarri aproposa zen lehiaketa hura. Eta gaur, Durangoko Azokari buruz idatziko nuela erabaki dudanean, igandeko elkarrizketa etorri zait burura. Elkarren arteko erlazioa antzeman dut. Nahiz eta, era batean, guztiz alderantziz izan.

Azaroan eguraldi kaskarra egiten badu ere (aitortu behar dut oso pozik nagoela hainbeste denbora pasa eta gero, euriaren etorrerarekin), eta egunak askoz ilunagoak badira ere, bertuteak ere topatzen ditut. Musikaren aldetik, edo behintzat, euskal musikaren aldetik, hilabete bikaina da. Durangoko Azokaren bezpera dela esan genezake. Euskal kulturaren erakusleihoa abenduaren lehen egunetan ospatzen da beti, eta aurreko asteetan bandek haien lanak aurkezteko aukera aprobetxatzen dute.

Aurreko astean Zea May eta Gatiburen disko berrien aurkezpenetan egon nintzen. Hertzainak bandak bere azken kontzertuari buruzko nondik norakoak eman zituen eta aste honetan Mikel Urdangarinen hurrengo lanaren nobedadeak ezagutuko ditugu. Eta hauek eredu gutxi batzuk baino ez dira.

Pixkanaka pixkanaka Durangoko Azoka berotzen dutenak. Izan ere, ni abendurako planak egiten hasi naiz. Dena prest berriz ere Durangora bueltatzeko. Egia da ondo baino hobeto egin diola aurre pandemiari. Idea ederra izan zen online denda egitearena 2020 iragarrezin horretan eta 2021an aurretik bertara joateko denbora tarte bat eskatu behar zenuen jende pilaketak ekiditeko. Oso ausartak izan dira azken urte hauetan eta horregatik benetan berezia da niretzat bertara bueltatzea. Elkar ikusiko dugu bertan.