Espainiako artzain-txakurren lehen txapelketa izango da larunbat eta igandean, Murgian

Espainiako artzain-txakurren lehen txapelketa izango da larunbat eta igandean Murgiako Murguia Border Collie izeneko txakurrak hezteko zentroan. Lehiaketan 40 artzainek eta 68 txakurrek parte hartuko dute, lau lehiaketatan, goizez eta arratsaldez, 08.00etatik 12.00etara eta 16.00etatik 20.00etara. Artzain horietatik, 14, Euskadikoak dira, eta txakurrei dagokienez, 9 euskal artzain txakur izango dira.

Oscar Murguía lehiaketaren antolatzaileak nabarmendu duenez, «ez da izango ohiko lehiaketa, askotariko artzain-txakur arrazak parte hartuko dutelako, eta puntuazioa ere desberdina izango delako, izan ere, artaldea kontrolatzeari eta gidatzeari, edo artaldearen eta artzainaren arteko elkarreraginari gehiago erreparatuko zaie».

Normalean zazpi minutuko bi ariketa izaten dira artzain-txakurren lehiaketetan, eta bi ariketetan punturik gehien lortzen dituenak irabazten du, penalizazioak barne. Murgian, berriz, hamar ariketa baino gehiago izango dira, bi zelai desberdinetan aldi berean, eta, esan bezala, puntuatzeko modua oso bestelakoa izango da.

Murguíak dioen moduan, «balorazio bidezkoagoa izango da. Bi arlo nagusiki kontuan hartuko dira. Alde batetik, artaldea gidatzeko eta kontrolatzeko egindako lana, eta bestetik, artaldearekin egindako lana, manipulazio lana ere esan geniezaiokeena; esaterako, ardiak artaldetik bereiztea eta multzoka jartzea».

Era berean, artzain-txakur arraza desberdinak lan egiten ikusteko aukera ere egongo da, besteak beste, 9 euskal artzain-txakur; 3 Gos d'Atura (Kataluniako artzain-txakurra), Pirinioetako artzain-txakur bat, 1 Kelpie australiar (Australiako artzain-txakurra), 1 mestizo, eta gainerakoak, Border Collieak.

Hiru sari banatuko dira. Lehen saria, edo sari nagusia, parte-hartzaile bakoitzaren baloraziorik onena jasotzen duenak eskuratuko du. Bigarren saria, lehiaketaren sari berezia izango da, 'Murgia' izenekoa, eta besteak beste, artaldean egindako lana, distantzia, ardi kopurua eta txakurraren arraza kontuan hartuko dira. Azkenik, hirugarren sariak, 'Kategoriak' izenekoak, artzain-txakurrak egindako lana sarituko du.

• Temas
• Murgia
• Euskera