Elkar Fundazioak Ikastolen Elkartea eta Eusko Ikaskuntza saritu ditu

Sari bikoitza. Elkar Fundazioak Ikastolen Elkarteari emango dio 'Ibilbideari' saria, eta Eusko Ikaskuntzari 'Proiektuari' saria. Sari banaketa maiatzaren 25ean izango da, Adunan, 19.00etatik aurrera. Gainera, ekitaldian, omenaldia eskainiko zaio hil berria den Joan Mari Irigoien idazleari.

Batetik, Ikastolen Elkartea nazio mailako erakundea da, Euskal Herriko zazpi lurraldeak bere baitan hartzen dituena, eta juridikoki interes ekonomikoko europar elkarte gisa egituratua. «Ikastolen sarea eta Ikastolen Elkartea Euskal Herriko hezkuntza euskalduntzen joateko ernamuina izan ziren pasa den mendeko 60 eta 70eko hamarkadetan. Haien ekarpena ezinbestekoa izan da hezkuntza euskaldunaren bidean eta euskararen berreskurapenerakoan, beste hainbat eragilerekin batera», gogoratzen dute Elkar Fundaziotik.

Halaber, «ikastolek hezkuntza euskalduntzeko egindako ekarpenaren parte da eskolarako materiala sortzeko egindako lana, eta horretan aipatzekoa da 70eko hamarkadatik aurrera Ikastolen Elkartearen eta Elkar Taldearen artean izandako harremana, non erakunde bakoitzak bere jakintza eta baliabideak jarrita, euskal curriculuma erreferente duen ikasmateriala eskaini dioten hezkuntza komunitate osoari, Euskal Herrian eta euskaraz sortutako materiala», gaineratzen dute.

Bestetik, Eusko Ikaskuntzak erdietsiko du 2023ko 'Proiektuari' saria, 'Kultur politiken azterketa' garatzeko. Eusko Ikaskuntza 2021etik lantzen dabilen 'Eskubide Kulturalak: Parte-hartze eta Gobernantzarako politikak' lan eta ikerketa lerroaren baitan txertatzen da egitasmoa. Elkarretik diotenez, «euskal kultura nabarmen baldintzatzen du txikia eta gutxitua izateak, eta XXI. mendeko munduan are eta konplikatuagoa izaten ari da haren garapena, transmisioa eta biziraupena bera».

• Temas
• Elkar
• Euskera